Alańsyzda bolǵan aýyr apat abaı bolýǵa shaqyrady

8 qańtar kúni tań aldynda Shym­kent qalasynyń orta­ly­ǵyn­daǵy úılerdiń birin­de qaıǵy­ly jaǵdaı oryn aldy. Kógil­dir otyn men aýa qosyn­dysy­nan barak ispettes salynǵan qos qa­batty úı jarylyp, osynda turyp jatqan eki otbasy úıindi astynda qaldy. Oqıǵa ornyna bardyq. Negizgi turǵyn úıge japsarlas salynǵan eki qabatty páter qam kirpishten kóterilgen. Bizdiń anyqtaǵanymyz, erli-zaıypty zeınetkerler bul baspanany eki otbasyna jalǵa bergen. Páter jaldap turyp jatqan áskerı qyzmetker Dáýren Jumalıev Qyzylorda oblysyndaǵy Qazaly aýdanynyń týmasy eken. Jarylys saldarynan onyń zaıyby Sábına Orynbaeva qaıtys bolǵan. Bir jastan endi asqan qyzy Arýjanǵa dárigerler mıy azdap shaıqalǵan degen dıagnoz qoıyp otyr. Arýjandy asa aýyr jaraqattan (ajaldan deýge aýyz barmaıdy) besik qutqaryp qalǵan. Al onyń ájesi Álııa Orynbaeva jedel járdem aýrýhanasynda jasandy apparatpen dem alyp jatyr. Dárigerler onyń ezilgen kók baýyryn operasııa jasap alyp tastaǵan. Jaldamaly páter­diń ekinshi ıesi 21 jastaǵy Qarly­ǵash Ahanovanyń denesin kúıik shalyp, aýrýhanaǵa túsken. Mamandar jary­lystyń oryn alý sebebin plıta men ırandyq kamınge kógildir otyn durys qosylmaǵannyń saldary dep otyr. Páter ıesi Amanbek Sáýirbaevtyń aıtýyn­sha, jylý qazandyǵy óz úıinde bol­ǵan. Al japsarlas salynǵan úıge 3 metr­­lik shlangamen eki kamforkaly gaz ben kamınge kógildir otyn tartylǵan. Shlan­­ga durys bekitilmegendikten, kógil­dir otyn aýa qosyndysymen jı­naq­­tala ke­le, ja­rylǵan. Bul alǵash­qy anyq­taýlar ǵana. Oblys ákimi Janseıit Túımebaev oqıǵa ornyna arnaıy kelip, zardap shekkenderge kómek kórsetýdi tıisti oryndarǵa tapsyrdy. Oqıǵa bolǵan kúni-aq ákimdik tarapynan qurylǵan komıssııa jumys jasap jatyr. Qazirgi kezde zardap shekken otbasylarǵa áleýmettik kómek kórsetý maqsatynda arnaıy komıssııa qurylyp, zerdeleý jumystary júrgizilýde. Sóıtip, oqys oqıǵadan zardap tartqan otbasylarǵa jergilikti bıýdjet esebinen 100 aılyq eseptik kórsetkish mólsherinde qarjylaı kómek berilip, ýaqytsha turý baspanasy syndy qosymsha áleýmettik qorǵaý sharalary qarastyrylyp jatyr. Sondaı-aq, qaıtys bolǵan otbasyna tıisti materıaldyq kómek pen tıisti qurylymdardyń uıymdastyrýymen qajetti demeýshilik kómekter berilýde. Oqıǵa ornynda bolǵan oblys ákimi aldaǵy ýaqytta azamattardy turaqty jáne ýaqytsha tirkeýge qatysty zańǵa engizilgen ózgeristerge oraı júrgiziletin tirkeý jumystary kezinde jeke baspanasy joq azamattar sanyn anyqtap, sol arqyly apatty úılerdi túgendeý jumystaryn júrgizýdi tapsyrdy. Apatty oqıǵa kezinde avarııalyq-qutqarý jumystaryna Ońtústik Qazaq­stan oblystyq tótenshe jaǵdaı­lar departamentinen 23 adam jáne 3 tehnıka, jedel-qutqarý jasaǵynyń 44 qyzmetkeri men 6 tehnıkasy (onyń ishinde 3 qyzmettik ıtimen 3 kıno­logııalyq esep, 1 medısınalyq-psı­hologııalyq qyzmet), órt sóndirý jáne avarııalyq-qutqarý jumystary qyzmetiniń 17 mamany, 4 tehnıka, medısınalyq apattar ortalyǵynyń 3 qyzmetkeri men quramynda 16 adam jáne 4 tehnıkasy bar jedel medısınalyq qyzmet ókilderi tartyldy. Sonymen qatar, osy kúni OQO Ishki ister departamentiniń 30 qyzmetkeri oqıǵa ornynda qorshaý jumystaryn qamtamasyz etip, energetıka jáne gaz sharýashylyǵy qyzmetiniń 4 qyzmetkeri elektr qýatyn jáne gazdy ajyratý jumystaryn júrgizdi. Biz oqıǵa ornyna kelgen «QazTransAımaq» AQ bas ınjeneri Sáken Is­maılovtan osy oqys oqıǵaǵa túsinik berýin ótingen edik. – Komıssııa qurylyp, tekserý jumystary júrip jatqandyqtan, ázirge baǵa berý qıyn, – dedi ol. – Zań boıynsha, úı ishine ornatylǵan gaz qondyrǵysy turǵyn úı ıesiniń jaýapkershiliginde bolady. Bizdiń shtatta páterlerdiń tehnıkalyq qaýipsizdik sharalaryn tekseretin ınspeksııa joq. Úı ıeleri jylytý maýsymy aldynda tıisti mekemelermen kelisimshartqa otyrady. Olar – kógildir otynǵa qatysy joq kóldeneń kók attylar emes, mamandandyrylǵan, arnaýly oryndardan attestattaýdan ótken, quzyretti organdardyń esebinde turǵan mekemeler. Apat oryn alǵan úıdiń tehnıkalyq qujattaryn alyp, zerdeleý jumystaryn júrgizemiz. Olar qujatymyz túgel degenimen, áli eshqandaı qaǵazyn ótkizbedi. Ákimdik úsh jaqty komıssııa qurdy. Olar barlyq úılerge tekserý jumystaryn júrgizedi. Kógildir otyn durys qosylmaǵan úıler ajyratylady. Munyń taǵy da osyndaı qaıǵyly oqıǵalar oryn almaýy úshin istelip jatqan amal ekenin túsinersizder. Apattyń saldary osyndaı boldy. Eki birdeı otbasynyń basyna aýyrtpashylyq tústi. Jas sábıi bar ana dúnıeden ótti. Onyń ornyn toltyrý, árıne, qıyn. «Qaıǵyny bólisse azaıady» deıdi dana halqymyz. Biz oqıǵa ornynan ákimdik qyzmetkerlerinen bólek, qıyndyqta qalǵan eki otbasyna qaıyrymdylyq kómegin usynyp jatqan azamattardy kóp kórdik. Al apattyń qandaı jaǵdaıda oryn al­ǵan­dyǵyn osy maqsatta qurylǵan arnaıy komıssııa naqty anyqtaıtyn bolady.  Ońtústik Qazaqstan oblysy Baqtııar TAIJAN, «Egemen Qazaqstan» Sýretti túsirgen Qaısar ShERIM