Almaty oqýshylary Ýnıversıadaǵa baılanysty 10 kún demalady

Almatyda ótetin 28-inshi qysqy Ýnıversıada oıyndaryna baılanysty qaladaǵy 218 myń oqýshy kezekten tys demalatyn boldy, dep habarlady Bilim jáne ǵylym mınıstrliginiń baspasóz qyzmeti. «Almatyda sanaýly kúnderden keıin Dúnıejúzilik qysqy Olımpıada oıyndary bastalady. Ońtústik astana bul jarysqa jan-jaqty daıyndalyp jatyr. Daıyndyq bilim berý salasyn da syrt aınalyp ótpedi. Atap aıtsaq, Ýnıversıada oıyndaryna baılanysty Almaty qalasynyń oqýshylary úshin 30 qańtar men 8 aqpan aralyǵynda qosymsha demalys beriledi», - delingen habarlamada. Halyqaralyq jarystar kezinde osyndaı sharalar ózge elderde de qolǵa alynǵan. Baspasóz qyzmetiniń habarlaýynsha, demalysqa shyqqan oqýshylar dúnıejúzilik stýdentter jarysyn ózderi baryp tamashalaı alady. «Almaty qalalyq bilim basqarmasynyń habarlaýynsha, bul qosymsha kanıkýl Naýryz meıramy kúnderine áser etpeıdi. Almatydaǵy oqýshylar Qazaqstannyń basqa oqýshylarymen birdeı 24 naýryz ben 1 sáýir aralyǵynda oqýyn jalǵastyryp, 1 sáýirde olarǵa toqsandyq baǵalar qoıylady. 4 sáýirde 4-shi toqsan bastalady»,-dep naqtylady derekkóz. Habarlanyp otyrǵandaı, bul ózgeris Almatydaǵy joǵary oqý oryndary men kolledjderdiń sabaqtar kestesine áser etpeıdi. Aıta keteıik, Almatyda 201 mektep bar, onda 218 myń oqýshy bilim alady.