Maqsat – eki altyn, bir kúmis medal

Kendi Altaıdan Ýnıversıadaǵa 42 sportshy qatysady Kıkbokstan álemniń 5 dúrkin chem­pıony, elimiz birinshiliginde san márte top jaryp, halyqaralyq jarystarda Qazaq eliniń týyn jelbiretken ataqty sportshy, budan buryn da oblystyq sport jáne týrızm basqarmasyn basqarǵan, sońǵy eki-úsh aıdan beri laýazymdy qyzmet tizginin qaıta ustaǵan Asqar Mojanovpen qysqy Ýnıversıada jóninde pikir almasqan edik. – Asqar Baıjigituly, Ýnı­ver­sıadaǵa qysqy sportpen shuǵyl­dana­tyn jerlesterimiz qansha jolda­maǵa ıe boldy? Kimderden úmit kútesiz? – Dúnıejúzilik Ýnıversıa­da­nyń elimizde ótýi álem jurt­shyly­ǵyn tańdaı qaqtyrarlyq eleý­li oqıǵa. Dárejesi jóni­nen Olımpııa oıyndarynan keıin ekinshi orynda turǵan Ýnıver­sıadaǵa álemniń 60-qa tarta eliniń saıyp­qyrandary qaty­sady, ony 80 mem­lekettiń 1 mıl­lıardqa jýyq kórermeni tamasha­laıdy. Qazaq eli táýelsizdik alǵan shırek ǵasyrda aýyr atletıka men bokstan álem chempıonattaryn, Azııa birinshilikterin, qazaq kúresinen «Qazaq barysy» sekildi basqa dúbirli halyqaralyq saıys­­tardy ótkizdi. Onyń ústine, As­tana­­da Ekspo-2017 kórmesi ót­pek. Bir jylda ǵalamat eki oqıǵa­nyń qatar ótýi shynynda da ǵajap jańalyq. Qysqy sport túrleri Kendi Altaı­da erekshe damyǵan. Shańǵy, bıatlon, taý shańǵysy, shaıbaly hokkeı sııaqty qys­qy sport túrlerinen jerlesterimiz júl­deli oryn­dardy ıelenip júr. Shyǵys Qazaq­stan oblysynyń stýdent­teri búgin­ge deıin 6 Ýnıversıadaǵa qaty­syp, 6 altyn, 4 kúmis, 6 qola medaldy qanjyǵalaǵan. Almaty­daǵy XXVIII Ýnı­ver­sıadadan eki altyn, bir kúmis medaldy alýdy maqsat tutyp otyrmyz. – Altyn medaldan úmitker­ler qatarynda kimdi aıtar edińiz? – Aldyn ala ton pishken jón bol­mas. Keıde qolda turǵan altyn­nyń bir mezette ýystan syrǵyp kete­tini de bar. Lıllıhamer Olım­pıa­­da­synda jerlesimiz Sheshkel­diń sóre­ge birneshe metr qalǵanda súri­nip, tórtinshi oryndy qanaǵat tut­qa­nyn qalaı umy­taıyq. Nemese ataq­ty shańǵyshymyz A.Poltora­nın­­niń álem chempıonatynda qulap qa­lyp, besinshi oryndy mise tut­qa­ny da este. Demek, taktı­ka­lyq ádis pen sheberlikti qatar meńger­gen­de ǵana dittegen mejege jete alasyz. Almatydaǵy Ýnıversıadaǵa Kendi Altaıdan 42 sańlaq qaty­syp, sporttyń 9 túri boıynsha baqtaryn synaıdy. Atap aıtqanda, shańǵy sportynan – 5, bıatlonnan – 5, taý shańǵysynan – 4, tuǵyrdan shań­ǵymen sekirýden – 3, frıstaıldyń mogýl jáne akrobatıka túrlerinen –7, kon­kı sportynan –1, shaıbaly hokkeıden – 11, snoýbord, shańǵy qossaıysynan – 2 stý­dent. Al elimiz boıynsha Ýnı­ver­sıadada barlyǵy 195 (onyń 103-i er, 92-si áıel) sportshy qatysady dep kúti­lý­­de. Demek, Qazaqstan quramasynyń tórt­ten birin bizdiń jerlesterimiz qurap otyr. Frıstaıldan álem chempıo­naty­nyń qola júldegeri, Álem kýbogy­nyń jeńimpazy Iýlııa Galysheva budan buryn da Dúnıe­júzi­lik Ýnıversıadada altyn al­­qa­ny jeńip alǵan. Bul joly da Iýlııa­dan tek altyn kútemiz. Dmı­trıı Reıh­erd, Pavel Kolmakov, bıat­­lon­shy Galına Vıshnevskaıa bir al­tyn, bir kúmis alsa, tamasha bo­lar edi. Frıstaıldyń akrobatıka túri­nen Aqjol Zamanbekov, shań­ǵy­dan Áset Dúısenov, Ivan Lıýft, Marına Matrosova, Anje­lıka Tarasova, kon­kı­den Elvıra Halıkova sııaq­­ty talantty jas­tary­­­myz namys­ty qoldan bermes de­gen oıdamyz. Qalaı degende de, el­­di­gi­miz ben bir­ligimiz synǵa túser sátte jer­les­teri­miz jeńis tuǵyry­nyń bıik satysynan kórinedi dep senemiz. – Ýnıversıada estafetasy bizde qashan ótedi? – Shyǵys Qazaqstanda estafeta 26 qańtarda ótip, oǵan 60-tan astam joǵary jáne orta arnaýly oqý oryndarynyń oqýda úzdik jas­tary qatyspaqshy. – Áńgimeńizge rahmet. Áńgimelesken Ońdasyn ELÝBAI, jýrnalıst О́SKEMEN