Miniso Japan – Almatyda

Japon brendi sanalatyn Miniso jyl­dyń alǵashqy aıynda Almatyda franshıza (fr. franchise – jeńildik)  boıynsha eki dú­ken ashty. Aldymen Miniso ataýy týraly birer sóz. Miniso – japon dúkenderiniń jelisi, álem­­dik rıteıler, ıaǵnı keń spektrli ból­shek saýda jasaýǵa beıimdelgen nysan. Kúnshyǵys elindegi mundaı saýda orta­lyq­tarynda azyq-túlikten bastap kosme­tıka, turmystyq hımııa, ydys-aıaq, tur­mys­tyq tehnıka men elektronıkaǵa deıin tal­ǵ­amaı satyla beredi. Almatyda alǵash ashylǵan bul eki dúkende belgili se­bep­terge baılanysty tek azyq-túlik qa­na sa­tylmaıdy. Qalǵanynyń barlyǵy sóre­ler­ge qoıyldy. Japonııalyq dúkender jelisiniń taǵy bir basty ereksheligi – satylatyn buıymdardyń árbiriniń baǵasy 900 teńgeden aspaıdy. Bári de halyq úshin, halyqtyń ıgiligi úshin. Eldiń qulaǵyn eleń etkizgen sýdaı jańa Miniso Kazakhstan saýda-jaılary Almatydaǵy ataqty «Aport» jáne Maxima saýda-oıyn saýyq orta­lyq­ta­rynan oıyp turyp oryn aldy. Qańtar aıynyń sońyna deıin elimizdiń bas qalasy – Astana­nyń turǵyndaryna qyzmetin kórsetip úl­ge­retin japonııalyq Miniso ile-shala res­pýblıkanyń 10 qalasynda osyndaı saýda núktelerin ashyp, el boıynsha keńinen qanat jaımaq oıy bar. Almatyǵa qaıta oralsaq, bul kúnderi qala turǵyndarynyń tili sheteldik ataý­larǵa kibirtiktegenimen, álemdik tanymal kompanııalardyń minsiz ári jańa zamanǵa saı jaıly qyzmetine boı úıretip alǵanyn da basa aıtqymyz keledi. Olaı deıtinimiz, dál qazirgi tańda elimizdiń burynǵy astanasynda sheteldik 14 myńnan astam kompanııa jumys isteıdi degenge bireý sener, bireý senbes. Aqıqaty solaı. Ol tanymal fırmalar álemniń 100 memleketinen kelgen. Ataýlaryna kóz ben qulaq úırengennen basqalaryn aıtpaǵanda, Alstom, Siemens, LG Electronics, Coca-Cola Bottlers-tiń izin ala Almatyǵa kelgen franshızdik Starbucks, McDonald’s, Ritz-Carlton kompanııal­ary qala turmysyna sińip aldy. Turǵyndar da ja­tyr­qap jatqan joq. Áıgili Kempinski-men qatar, álem tanyǵan Hilton jáne Qarotel meı­manhanalary tipti taıaýda ásem Alataý bókterinde qonaq qabyldaýǵa ázirlenip jatyr... Aldaǵy jyldyń kókjıeginen nemis rıteıleri, ıaǵnı bólshek saýda sheberi OBI Almatyda asa aýqymdy alǵashqy gıpermarketin ashýdy kózdep otyr. Al fransýzdyq turmystyq qyzmet rıteıleri Leroy Merlin kompanııasy taıaýda ǵana osy aýmaqtan bolashaq meken-jaıyn anyqtap, jaılasar ornyn shegelep ketti. Bizben áńgimesinde Almatynyń kásipkerlik pen ındýstrııalyq-ınnovasııalyq damý bas­qar­ma­sy alyp shahardyń qazirgi kezde dúnıe jú­ziniń saýda rynogyndaǵy azýyn aıǵa bilegen TNK jáne CITIC, Evonic, Staay Food Group, Medical Union Pharmaceuticals, Veolia sııaqty alpaýyt kompanııalarymen kelissózdiń júrgizilip jatqanyn alǵa tartty. El táýelsizdiginiń besigi sanalatyn Almaty qalasy turǵyndarynyń búgingi qýa­nyshy –  Miniso Kazakhstan bólshek saý­da dúkenderindegi halyqqa kórsetilgen qaınaǵan qyzmet der edik. Miniso-nyń da alyp qalanyń shyraıyn asharyna jurt senip júr. О́ıtkeni, ol – Qazaqstanǵa Kúnshyǵys elinen jetken syı! Talǵat SÚIINBAI, «Egemen Qazaqstan» ALMATY