Erliktiń eskertkishi qashanda eńseli

Aqtóbede ótken jylǵy 5 maýsymda áskerı bólimge qarýly qylmyskerlerdiń shabýyly kezinde erlikpen qaza tapqan áskerı qyzmetshilerge arnalǵan memorıaldyq taqta ashyldy. Ulttyq ulannyń qurylýyna 25 jyl tolýyna oraı «Batys» óńirlik qolbasshylyǵyna qarasty №6655 áskerı bóliminiń aýmaǵynda qarýly qylmyskerlerdiń shabýyly kezinde erlikpen qaza tapqan áskerı qyzmetkerlerdi  eske alý sharasy ótkizildi. Memorıaldyq taqtanyń saltanatty ashylý rásimine oblys ákimi Berdibek Saparbaev, óńirde jumys saparymen júrgen Parlament depýtattary Vladımır Bojko, Eleýsin Saǵyndyqov, Abaı Tasbolatov, Baqtyqoja Izmuhambetov, Gleb Shegelskıı, Jambyl Ahmetbekov, Quralaı Qaraken, coǵys jáne ishki ásker ar­dagerleri, quqyq qorǵaý organdarynyń qyz­­metkerleri, sondaı-aq, qaza bolǵan sar­bazdardyń ata-analary men týystary qatysty. Oblys ákimi memleketimiz jańa qu­ryl­ǵan kezde Elbasy Qarýly Kúshterdi, so­nyń ishinde burynǵy  Ishki áskerler, qazirgi Ulttyq ulandy  qurý týraly mańyzdy sheshim qabyldaǵanyn atap ótti. Qazaqstan táýelsiz memleket bolyp jarııalanǵan soń, 1992 jyly 10 qańtarda alǵashqy bolyp  Quqyqtyq tártip áskeri qurylǵanyn jetkizdi. – Búgin biz ómiriniń sońyna deıin Otan aldyndaǵy antyn adal oryndaǵan,  elimiz turǵyndarynyń qaýipsizdigin qamtamasyz etken batyrlardyń qurmetine arnalǵan  eskertkish taqtany ashyp otyrmyz. Bul bizdiń qaza tapqandarǵa kórsetetin qurmetimizdiń basy ǵana bolsyn, – dedi óz sózinde Parlament Májilisi Tóraǵasynyń orynbasary Vladımır Bojko. Memorıaldyq taqtanyń ashylý rá­si­min­de qaza tapqandardyń ata-analary men ja­qyn týystary da sóz sóıledi. Aıta keteıik, 2016 jyldyń 5 maýsymynda 18 adamnan quralǵan lańkestik top Aqtóbe qalasynyń eki qarý-jaraq dúkenine shabýyl jasap, áskerı bólimniń aýmaǵynda ornalasqan qarý-jaraq qoımasyn basyp alýǵa umtylǵan bolatyn. Oqystan shabýyldaǵan qarýly qylmyskerlerge qaımyqpaı tótep bergen UQK «Batys» óńirlik qolbasshylyǵynyń maıory Danıel Maılybaev, kelisimshart negizindegi áskerı qyzmetker, kishi serjant Berikjan Qalıev, merzimdi qyzmettegi sarbaz Dosbol Sapar erlikpen qaza tapty. Qazaqstan Prezıdentiniń 2016 jylǵy 5 jeltoqsandaǵy №382 Jarlyǵymen «Áskerı jáne qyzmettik boryshyn úlgili at­qarǵany, zańdylyq pen quqyqtyq tár­tipti qamtamasyz etýde, eldiń ulttyq qa­ýip­sizdigi men qorǵanys qabiletin nyǵaıtý ke­zinde kórsetken erligi men qajyrlyǵy úshin» maıor Danıel Maılybaev II dárejeli «Aıbyn» ordenimen marapattalyp (qaza bolǵannan keıin), «podpolkovnık» áskerı ataǵy berildi, kishi serjant Berikjan Qalıev pen qatardaǵy jaýynger Dosbol Sapar (qaza bolǵannan keıin) III dárejeli «Aıbyn» ordenimen marapattaldy. Sonymen qatar, III dárejeli «Aıbyn» or­denimen Baqtııar Qaıyrbekov, «Jaýyn­ger­lik erligi úshin» medalimen Syrym Sún­detov, Denıs Chernyshov marapattal­dy. Satybaldy SÁÝIRBAI, «Egemen Qazaqstan» AQTО́BE Sýretti túsirgen Haıreden RAÝShANOV