Sanıtarlyq erejeler sany azaıdy

Aldaǵy ýaqytta elimizde sanıtarlyq erejelerdi múldem alyp tastaý josparlanyp otyr, dep habarlaıdy QazAqparat. «Búginde óndiristik baqylaý engizile bastady. Sonyń negizinde biz sanıtarlyq erejelerdi múldem alyp tastaýdy josparlap otyrmyz. Sebebi óndiristik baqylaýdyń arnaıy baǵdarlamasy bolady. Ol HASSP (Hazard Analysis and Critical Control Point -qaterlerdi taldaý men qaýipti salalardy anyqtaý) prınsıpterine negizdeledi. Bul degenimiz, árbir óndiris boıynsha qaýip-qaterler anyqtalady. Qazir bárin tıptik sıpatta jasaıtyn keńester odaǵy emes qoı. Sondyqtan qaýip-qaterlerdi anyqtap, sonyń aldyn alý sharalaryna negizgi basymdyq beriledi», - deıdi QR Ulttyq ekonomıka mınıstrliginiń Tutynýshylar quqyǵyn qorǵaý komıteti tóraǵasynyń orynbarsy - Bas memlekettik sanıtarlyq dáriger Jandarbek Bekshın. Onyń aıtýynsha, búginde sanıtarlyq erejelerdiń sany 700-den 67-ge deıin azaıǵan. Osylaısha, atalǵan erejeler on esege qysqaryp otyr. Al sanıtarlyq erejelerde kórsetilgen talaptardyń sany alty jyldyń ishinde 14 myńnan 3,5 myńǵa deıin azaıdy.