Ońtústik Koreıanyń mádenıet mınıstri qamaýǵa alyndy

Ońtústik Koreıanyń mádenıet, sport jáne týrızm mınıstri Cho Iýn Sýn qamaýǵa alyndy, dep habarlaıdy RIA Novostı. Oǵan prezıdent Pak Kyn Heniń bıligine qarsy óner qaıratkerleriniń «qara tizimin» jasady degen kúdik keltirilgen. Tizimde kórsetilgen tulǵalardyń qandaı da bir memlekettik sýbsıdııa nemese basqa da qoldaý túrlerinen qaǵylýy qarastyrylǵan. Ol tizimge 9400-den astam ártis, mýzykant pen mádenıet qaıratkeri ilingen. Sot sondaı-aq prezıdent ákimshiliginiń burynǵy basshysyn qamaýǵa alý týraly sheshim shyǵardy. Aıta keteıik, Cho Iýn Sýn – qyzmettik mindetin atqaryp jatqan kezde ustalǵan alǵashqy mınıstr. О́tken jyldyń kúzinen bastap Ońtústik Koreıada prezıdenttiń qurbysy – Soı Sýn Sılge qatysty jemqorlyq daýy týyndaǵan bolatyn. Quqyq qorǵaý organdary ony eshqandaı memlekettik qyzmette bolmaǵanyna qaramastan, prezıdenttiń saıası sheshimderdi qabyldaýyna áser etken, sondaı-aq memleket basshysymen jaqyn qarym-qatynasyn paıdalanyp, ońtústikkoreılik korporasııalardan iri kólemde para talap etken degen kúdik keltirdi.