Qazaqstan jastar quramasy – Granatkın týrnıriniń kúmis júldegeri (vıdeo)

Fýtboldan Qazaqstan jastar quramasy (U18) Granatkın memorıaly týrnıriniń fınalynda Reseı quramasymen kezdesip, 0:1 esebimen ese jiberdi. Sankt-Peterbýrg qalasyndaǵy match tartysqa toly ótti. Birinshi taımnyń ortasyna qaraı reseılikter qaqpashymen betpe-bet shyqqan, alaıda qazaqstandyqtyń baǵy basym bolyp, goldan aman saqtap qaldy. Degenmen, Granatkın memorıalynda tájirıbesi bizden kósh ilgeri Reseı quramasy 27-mınýtta jalǵyz ári jeńisti goldy soǵyp ketti. Nátıjeli soqqynyń avtory – Nıkıta Polıakov. Kezdesýdiń ekinshi 45 mınýtynda Aleksandr Kýznesovtan jańa nusqaýlar alǵan órenderimiz adýyndy shabýyldarǵa kóshti. Tóreshiniń ysqyryǵy estilisimen oıyn tizginin óz qolyna alyp, doptan aırylǵan tustarda qarsylasyn qyspaqqa alýǵa tyrysyp baqty. Urymtal tustarda birneshe qaýipti soqqy baǵyttap ta úlgergen. Biraq osyndaı oraıly sátter jerlesterimizdiń ýysynan sýsı berdi. О́kinishke oraı, match sońyna deıin tablodaǵy esep ózgerissiz qaldy. Sonymen qatar, bul kúni jarystyń úshinshi orny úshin Sankt-Peterbýrg pen Grekııa komandalary synǵa túsip, týrnır ıeleri 4:2 esebimen jeńiske jetti. Jeńimpaz ujymnan Efrem Vartanıan (29, 57-mınýttarda), Nıkıta Koldýnov (44-mınýt) jáne Rýslan Kazakov (51-mınýt) mergendigimen tanylsa, grekterden Afanasıos Kostanasıos (20-mınýt) pen Georgıos Tzovaras (74-mınýt) kózge tústi. Aıta keteıik, jastarymyz Granatkın týrnıriniń fınalyna alǵash ret shyǵyp tur. Buǵan deıin 2012 jyly sońǵy, 2014 jyly 16-orynǵa ıe bolsa, 2015 jyly 14 komandanyń arasynda 10-orynǵa ornalasqan.