Qazaq kúresi Azııa oıyndarynyń baǵdarlamasyna endi

Qazaq kúresi bıyl Ashhabadta ótetin Azııa oıyndarynyń baǵdarlamasyna engizildi. Bul týraly bloger Ǵalym Baıtúk Facebook-tegi paraqshasynda jazdy, dep habarlaıdy Baq.kz. «Súıinshi, dostar! Bizdiń ulttyq kúresimiz – qazaq kúresi Ashhabadta bıyl ótetin Azııa oıyndarynyń baǵdarlamasyna alǵash ret endi! Tanymal 22 sport túrimen qatar 70 keli, 90 keli, +90 keli salmaq dárejelerinde qazaq kúresinen beldesýler bolady. Ol úshin 2004 jyldan bastap búginge deıin Serik Túkıev bastaǵan Búkilálemdik Qazaq kúresi federasııasy qyrýar jumys atqardy», – dep jazdy Ǵalym Baıtúk. Onyń aıtýynsha, 12 jyldyń ishinde 50-ge tarta elden sportshylar qatysqan 6 álem chempıonaty, 11 Azııa chempıonaty, 3 álem kýbogy, 3 Eýropa men Afrıka chempıonaty ótkizildi. «2015 jyly Qazaq kúresi UWW (United World Wrestling – Birikken álemdik kúres odaǵy) quramyna kire otyryp, erekshe mártebe aldy. 19 qańtar kúni UWW prezıdenti Nenad Lalovıch pen Azııa Olımpıada keńesiniń prezıdenti Sheıh Ahmed Ál-Fahad Ál-Ahmet Ál Sabah arasynda 70 keli, 90 keli, +90 keli salmaq dárejelerinde Qazaq kúresin 2017 jyly Azııa oıyndarynyń baǵdarlamasyna engizý týraly kelisimge qol qoıyldy», – dep tolyqtyrdy bloger.