Sýret: baq.kz
Ertis-Baıan óńirindegi memlekettik orman qory – 478,7 myń gektar. Onyń 312,1 myń gektary ormanmen kómkerilgen. Orman sharýashylyǵy salasynda oblys ákimdigine qarasty úsh orman qorǵaý mekemesi jumys isteıdi. Sonymen qatar óńirde eki respýblıkalyq tabıǵat qorǵaý mekemesi bar: «Ertis ormany» rezervaty jáne Baıanaýyl memlekettik ulttyq tabıǵı parki.
– О́ńir ormandarynda negizinen qaraǵaı, qaıyń, kókterek, terek, tal, jóke aǵashtary keń taralǵan. Ásirese Ertis boıyndaǵy qaraǵaıly alqaptar aımaqtyń tabıǵı baılyǵy sanalady. Tabıǵat qorǵaý mekemelerinde tórt tálimbaq bar. Onyń úsheýi – «Ertis ormany» aýmaǵynda, bireýi Baıanaýyl ulttyq parkinde ornalasqan. Alaıda olar oblystyń kóshetterge degen jyldyq suranysyn tolyq qamtamasyz ete almaıdy. Sondyqtan qajetti kóshetter syrttan satyp alý jáne ýaqytsha tálimbaqtar uıymdastyrý arqyly qamtamasyz etiledi, – deıdi Pavlodar oblysynyń jer qoınaýyn paıdalaný, qorshaǵan orta jáne sý resýrstary basqarmasynyń basshysy Saǵyn Tóleýtaev.
Mamandardyń aıtýynsha, bıyl jalpy aýmaǵy 1 250 gektar jerge 7,8 mıllıon kóshet otyrǵyzý kózdelgen. Onyń basym bóligi – qylqan japyraqty qaraǵaı men qatty aǵash tuqymdas qaraǵash. Qazir kóktemgi orman otyrǵyzý naýqanyna daıyndyq júrip jatyr.
– Memleket basshysynyń tapsyrmasy men ormandardy molyqtyrý boıynsha bekitilgen keshendi jospar sheńberinde 2021 jyldan bastap memlekettik orman qory aıtarlyqtaı ulǵaıyp keledi. Tek byltyr óńirde 1 150 myń gektar alqapqa qylqan japyraqty jáne japyraqty tuqymdylardyń 6,5 mln kósheti otyrǵyzylǵan, – dep qosty S.Tóleýtaev.
Ormandardy saqtaý aǵash otyrǵyzýmen shektelmeıdi. Aýrýǵa shaldyqqan, zaqymdanǵan nemese qýraǵan aǵashtardy ýaqtyly anyqtap, sanıtarlyq kesý jumystaryn júrgizý – ormannyń ekologııalyq tepe-teńdigin saqtaýdyń mańyzdy bóligi. Oblysta iriktep jáne jappaı sanıtarlyq kesý jumystary turaqty túrde júrgiziledi. Mamandar orman órtteri men zańsyz aǵash kesý derekteri negizgi másele bolyp otyrǵanyn aıtady. Ásirese qurǵaqshylyq jyldary órt qaýpi kúsheıedi. Osyǵan baılanysty aldyn alý sharalary kúsheıtilgen. Keıingi jyldary orman sharýashylyqtarynyń materıaldyq-tehnıkalyq bazasy da edáýir nyǵaıǵan. 2022–2025 jyldary 5 órt avtosısternasy, 8 traktor, 10 shaǵyn órt kesheni, 33 motosıkl jáne ózge de arnaıy tehnıka satyp alynǵan. Bıyl taǵy 47 tehnıka alý josparlanyp otyr. Sonymen qatar 2022 jyldan bastap orman sharýashylyǵy mamandarynyń jalaqysy kezeń-kezeńimen ósip keledi. Bul – saladaǵy kadr tapshylyǵyn azaıtýǵa, mamandardy ustap qalýǵa baǵyttalǵan shara.
Pavlodar oblysy
