«Aýyl» partııasy Ortalyq apparat basshysynyń orynbasary Nurhat Orash elimizdiń túkpir-túkpirin aralap, jurtshylyqpen kezdesip júrgen «Ádiletti jáne progressıvti Qazaqstannyń halyqtyq Konstıtýsııasy úshin» jalpyulttyq koalısııa múshelerine «Jańa Konstıtýsııany qabyldaýdyń qanshalyqty qajettiligi boldy?» degen saýal jıi qoıylatynyn jasyrmady. Onyń aıtýynsha, qazirgi júrgizilip jatqan Konstıtýsııalyq reforma – 2022 jyly bastalǵan saıası ózgeristerdiń zańdy ári logıkalyq jalǵasy. Sol jyly Ata zańymyzǵa engizilgen reformalardyń alǵashqy paketi qabyldanyp, el damýdyń jańa kezeńine aıaq basty. 2025 jyldyń qyrkúıeginde Memleket basshysy Q.Toqaev sýperprezıdenttik basqarý úlgisinen «Kúshti Prezıdent – yqpaldy Parlament – esep beretin Úkimet» qaǵıdatyn usyndy. Osy kezde birqatar qoǵam belsendileri men sarapshylar Parlamentti ýnıtarlyq memleket qurylysyna saı reformalaýdy usynys etip, 2025 jyly qyrkúıektegi Joldaýynda Memleket basshysy osy máseleni talqylaýǵa shyǵardy. Arnaıy jumys toby quryldy. Komıssııa múshelerine 2 myńnan asa usynys tússe, onyń 600-i Parlament jumysyna qatysty, al 1 500-i memlekettik bıliktiń basqa tarmaqtary men Konstıtýsııanyń keı baptaryn reformalaýdy kórsetken. Osylaısha, Parlamentti reformalaý aýqymdy konstıtýsııalyq reformaǵa ulasty.
«Qoǵamdyq kelisim» RMM jetekshi sarapshysy, PhD Erjan Ibraev Ata zań jobasynda 77 bapqa qatysty ózgerister engizilip jatqanyn habarlady.
«Konstıtýsııa jobasynyń basty ereksheligi – adamǵa baǵdarlanǵan sıpaty men ıdeologııalyq mazmunynyń kúsheıtilýi. Osy negizde memlekettiń strategııalyq baǵyty – bilim men ǵylym, ınnovasııany damytý, mádenıetti órkendetý. О́ıtkeni álemde adam boljaı almaıtyn úrdister oryn alyp jatqan qazirgi ýaqytta bilim men ınnovasııa salasy óte ózekti. Eshbir tabıǵı qazba baılyǵy joq elderdiń adam kapıtalyn ulǵaıtyp, joǵary damyǵan memleketter qataryna enip otyrǵany bizdi de oılandyrýǵa tıis. 1965 jyly táýelsizdik alǵan kezde óte kedeı memleket Sıngapýr «eldiń baılyǵy – bilimdi adam» degen ustanymmen, bilim men tehnologııaǵa, oǵan qosa tártip pen eńbekqorlyq sııaqty adamı qasıetterge basymdyq berip, 25 jyl ishinde «Azııa barysyna» aınaldy. Sıngapýr 2025 jyly ekonomıkalyq básekelestik boıynsha Shveısarııadan keıin ekinshi orynǵa, sol jyly kapıtaly boıynsha birinshi orynǵa kóterildi. О́tken jyly Qazaqstan adam damý ındeksi boıynsha álemde 67-orynǵa ıe boldy. Bul ortadan sál joǵary deńgeıdegi memleketter qataryna engenimizdi bildiredi. Bir sózben aıtqanda, elimizdiń áleýeti óte zor. Oǵan elimizdiń keıingi jyldary bilim men ǵylymdy damytýǵa aıryqsha kóńil bólip jatqany dálel bolady. Memleketimiz jastarǵa ınvestısııa quıyp jatyr. Bilimmen qosa tárbıeni de qatar alyp júrýimiz óte mańyzdy», dedi E.Ibraev.
Oblystyq jastar saıasaty basqarmasy basshysynyń orynbasary Mádı Jaılybaıuly óńir jastaryn 15 naýryz kúni bolatyn referendýmǵa qatysýǵa shaqyrdy.
Aıta ketý kerek, Aqtóbe oblysynda 18–35 jas aralyǵyndaǵy 220 myńdaı jas turady. Jas belsendi Dastan Qurmanbaı jańa Konstıtýsııa jobasyndaǵy volonterlik qyzmetke qatysty baptyń engizilýi jastarǵa senim berip, qaıyrymdylyq is jasaýǵa qumar jandar qataryn kóbeıtedi degen pikirde.
Aqtóbe oblysy
