Pavlodarda qazaq tilin meńgergen ózge ult ókili EKSPO-ǵa tegin bılet alady

Pavlodarda serpindikterdiń bastamasymen jańa joba qolǵa alyndy, dep habarlaıdy QazAqparat. Osy jóninde «Serpin» iskerler uıymy Pavlodar oblysy boıynsha fılıalynyń tóraǵasy Daryn Tájibaev málim etti. «Pavlodarlyq serpindikter «Qazaqstandyq arman» atty qoǵamdyq birlestik qurǵan bolatyn. Osy uıymmen jáne Qazaqstan halqy Assambleıasy jastar qanatynyń jetekshisi Elına Paýlımen birlese otyryp, «Qazaqsha sóıleý ońaı» jobasyn bastadyq. Ereje boıynsha qazaq tilin meńgerýdi maqsat tutqan kez kelgen ózge ult ókili men bir serpindik qosylyp, jeke jup bolady. Olarǵa bir aı ýaqyt berilip, konkýrstyq júıede jeńimpaz anyqtalady. Shamamen 1 naýryz kúni qorytyndysy shyǵyp, nátıjeli jumys jasaǵan jup EKSPO-2017 kórmesine tegin bılet utyp alady», – dedi oblystyq «Serpin» fılıalynyń tóraǵasy. Daryn Tájibaevtyń aıtýynsha, búginde 44 adam  jazylyp,  22 jup iske kirisip ketken. Jobanyń negizgi maqsaty – qazaq tilin damytý, serpindik stýdentterdiń jergilikti adamdarmen qarym-qatynasyn nyǵaıtý.