Alaý estafetasy kúni Astanada birneshe kóshe jabylady

Alaý estafetasy 25 qańtar kúni saǵat 11:00-de Nazarbaev Ýnıversıtetinen bastalyp, qala ákimdiginiń mańyndaǵy alańda aıaqtalady. Alaýdy belsendi stýdentter men astanalyq sportshylar, barlyǵy 60 adam alyp ótpek. Bul týraly Astana ákimdiginiń baspasóz qyzmeti habarlady. Estafeta 2 kezeńge bólingen. Ol Qabanbaı batyr dańǵyly – Dostyq kóshesi – Qonaev kóshesi – Baraev kóshesi – Respýblıka dańǵyly – Kenesary kóshesi syndy qalanyń ortalyq kóshelerimen ótedi. Alaý estafetasynyń jalpy uzyndyǵy – 12 shaqyrym. Osyǵan oraı saǵat 10:00-den 12:30-ǵa deıin: Qabanbaı batyr dańǵylynda Turar Rysqulov kóshesinen bastap, Dostyq kóshesine deıin; Dostyq kóshesinde Qabanbaı batyr dańǵylynan bastap, Túrkistan kóshesine deıin kóliktiń barlyq túrlerine qozǵalys ishinara shekteletinin eskertemiz. Sondaı-aq, 2017 jyldyń 25 qańtar kúni saǵat 12:45-15:00-ge deıin: D. Qonaev kóshesinde Túrkistan kóshesinen bastap, Qabanbaı batyr dańǵylyna deıin; Qabanbaı batyr dańǵylynda D. Qonaev kóshesinen bastap, «Ramstor» SO-nyń avtoturaq aýmaǵyna deıin (Respýblıka dańǵ.); Respýblıka dańǵylynda «Ramstor» SO-nyń avtoturaq aýmaǵynan bastap, Kenesary kóshesine deıin; Kenesary kóshesinde Respýblıka dańǵylynan bastap, Astana qalasynyń eski alańyna deıingi aýmaqta qozǵalystar shekteletin bolady. Avtojúrgizýshiler úshin qala bıligi keptelisterdiń aldyn alý úshin joldar kezek-kezek jáne júrý jolaǵy boıynsha ǵana jabylady. Bul júrgizýshiler úshin yńǵaısyzdyqtardy barynsha azaıtýǵa múmkindik beredi. Birinshi kezeń aıaqtalysymen «Báıterek» monýmentiniń aldynda turǵyndar men qala qonaqtaryna arnalǵan konserttik baǵdarlama usynylady. Ekinshi kezeńde alaý respýblıkalyq shtab ókilderine tabystalyp, 2017 jylǵy 28-shi Dúnıejúzilik Ýnıversıadanyń ashylý saltanatyna qatysý úshin Astana-Almaty áýe reısimen ońtústik astanaǵa jetkiziledi.