Volonter bolý – abyroı

Álemniń stýdentteri baq synaıtyn Olımpıada – sportshylar úshin ǵana emes, basqa salada oqyp júrgen jastar úshin de mańyzdy. Eki apta boıy álem jurtshylyǵynyń nazarynda bolatyn elimiz úshin basty murat – dúbirli dodany abyroımen ótkerý. Sportshylardyń alǵashqy legi kelgen kúnnen bastap aıaǵynan tik turyp qyzmet kórsetetin erikti deıtin qaýym bar. Volonter – óz erkimen qyzmetke jegilgenimen, atqarary jeńil-jelpi sharýa bolmasa kerek-ti. Elimiz ǵana emes, shet memleketterden de ótinishter az túspegenge uqsaıdy. Barlyǵy 3 000 eriktiniń 2 800-i – Almatydan, 100-i – elimizdiń ár túk­­pirinen, qalǵan 100 stýdent shet el­der­den. Almatyda ótetin HHVIII qysqy Ýnıversıada oıyndarynda erikti bolýǵa, ásirese, AQSh, Germanııa, Ulybrıtanııa, Reseı, Qytaı, Koreıa elderi qyzyǵýshylyq tanytypty. Volontermen jumys isteý jónindegi departamenttiń málimetinshe, osy mindetti atqarýǵa 15 000-nan astam ótinish túsken. Solardyń ishinen talapqa tolyqtaı jaýap beredi degenderdi iriktep alý da ońaıǵa soqpasa kerek. Sondyqtan, eriktiniń bir aty – tańdaýly deýge keledi. Bir ǵana emes, birneshe shet tilin meńgerý, Qazaqstannyń, Almatynyń tarıhyn jaqsy bilý – basty talap. Sondyqtan, qazir tańdaýly 3 000 stýdenttiń bilimin jetildirý, tildik deńgeıin kóterý máse­leleri boıynsha trenıngter ótkizilip boldy, qonaqtardy kútip alýǵa daıyn. Aıta ketý kerek, volonterler 32 baǵyt boıynsha qyzmet etedi. Ýnıversıada jaqyndaǵan saıyn daıyn­dyqtar jan-jaqty pysyqtalýda. Almaty qalasynyń ákimi Baýyrjan Baıbek volon­ter­lermen kezdesip, isterine sáttilik tiledi. Volonterlerdiń basym kópshiligi bul mindet aldymen ózderiniń bolashaǵy úshin mańyzdy ekenin aıtady. Mundaı álemdik sharalarda jınaǵan tájirıbeniń ómirlik úlken sabaq bolatynyna senimdi.  Almas NÚSIP, jýrnalıst  ALMATY