Qazaqstan Respýblıkasynyń Prezıdenti
N.Á.Nazarbaevtyń Úndeýin qoldaý týraly Qazaqstan halqy Assambleıasynyń
MÁLIMDEMESI
Qurmetti otandastar! 2017 jylǵy 25 qańtarda Qazaqstan Respýblıkasynyń Prezıdenti Nursultan Ábishuly Nazarbaev memlekettik bıliktiń tarmaqtary arasynda ókilettikterdi qaıta bólý máseleleri týraly Qazaqstan halqyna Úndeý jarııalady. Qazaqstan halqy Assambleıasy Memleket basshysynyń eldiń múddesi men zamannyń talabyna saı keletin, bıliktiń barlyq tarmaqtarynyń ókilettikterin jáne jaýapkershiligin arttyrý bastamasyn tolyq qoldaıtynyn bildiredi. Elbasynyń basshylyǵymen el Táýelsizdiginiń 25 jyldyq jetistikteri, Bes ınstıtýttyq reformany iske asyrý, qazaqstandyq biregeılik pen birlikti nyǵaıtý jumystarynyń júrgizilýi, «Máńgilik El» Patrıottyq aktisiniń qabyldanýy – Prezıdenttiń óz quzyretiniń bir bóligin Parlamentke, Úkimetke jáne atqarýshy bılik júıesine berý týraly tarıhı sheshimine memleket pen qazaqstandyq qoǵamnyń tolyǵymen daıyn ekendiginiń sózsiz dáleli. Úkimettiń jáne atqarýshy bıliktiń Parlament pen jergilikti ókildi organdar aldynda esep berýin kúsheıtý – Qazaqstannyń demokratııa jolyndaǵy odan ári ornyqty da buljymas jańa qadamy. Bul Úkimetke de, Parlamentke de Qazaqstan halqynyń aldynda zor jaýapkershilik júkteıdi. Elbasynyń bastamasy Qazaqstannyń damýyna sony serpin qosatyny sózsiz. Qazaqstannyń álemniń damyǵan otyz memleketiniń qataryna qosylý, Bolashaǵy birtutas el bolý jolyndaǵy mindetteri utymdy sheshimdi talap etedi. Prezıdent Nursultan Ábishuly Nazarbaevtyń qabyldaǵan sheshimi asa pármendi saıası jańashyldyq jáne qoǵamdaǵy áleýmettik ahýaldyń kúrdelenýine, álemdik saıası úderistiń jańa úrdisterine jaýap bolyp tabylady. О́kilettiktermen bólisý – Prezıdenttiń barshaǵa belgili saıası qoltańbasynyń, búkil álem moıyndaǵan «qazaqstandyq joldyń» jarqyn kórinisi. Bul qadam Qazaqstannyń beıbitshilik pen kelisim strategııalyq saıasatyna, senim saıasatyna tolyǵymen úndes jáne qoǵamnyń memlekettik basqarý isine qatysýyn keńeıtedi. Elbasy Nursultan Nazarbaevtyń saıası erik-jigeri zań shyǵarýshy bıliktiń rólin arttyrý arqyly halqymyzdyń birligi men kelisimin nyǵaıtýǵa baǵyttalǵan jáne Qazaqstandaǵy demokratııalyq úderisterdi jalǵastyrýǵa tyń serpin berip otyr. Qazaqstan halqy Assambleıasy bul turǵyda, Assambleıadan saılanǵan Parlament Májilisiniń depýtattaryna, máslıhattardaǵy QHA depýtattyq toptarynyń múshelerine, qoǵamdyq kelisim keńesterine, etnomádenı birlestikter men QHA qurylymdarynyń barlyq ókilderine zor jaýapkershilik artady jáne saıası reformalardy ázirleý men iske asyrý úderisterin qoldaý úshin joǵary azamattyq boryshyn óteýge shaqyrady. Biz, Qazaqstan halqy Assambleıasy Keńesiniń músheleri, prezıdenttik jańa reformany talqylaýǵa qatysýshylardyń barlyǵyn – saıasatkerlerdi, sarapshylardy, ǵylymı jáne shyǵarmashyl zııaly qaýym ókilderin, jastardy, azamattyq qoǵam jáne buqaralyq aqparat quraldary ókilderin osy máselege erekshe azamattyq jaýapkershilik turǵysynan qaraýǵa shaqyramyz. Biz Prezıdenttiń Qazaqstan halqynyń ál-aýqatyn arttyrýǵa jáne órkendeýi úshin júzege asyrylatyn jańa bastamasynyń tabysty júzege asatynyna kámil senemiz! Qazaqstan halqy Assambleıasynyń Keńesi Astana q., 2017 jylǵy 26 qańtar
