Foto: Eńbek jáne halyqty áleýmettik qorǵaý mınıstrligi
Áleýmettik kómek – memlekettiń ataýly qoldaý sharasy jáne belgilengen muqtajdyq krıterıılerine sáıkes keletin, ómirlik qıyn jaǵdaıǵa tap bolǵan azamattarǵa ǵana kórsetiledi.
Mınıstrliktiń habarlaýynsha, kómek taǵaıyndaý qoldanystaǵy zańnamada jáne máslıhattardyń sheshimderinde aıqyndalǵan negizder boıynsha júzege asyrylady, belgilengen talaptarǵa sáıkestigi qujat júzinde rastalǵan jaǵdaıda ǵana múmkin bolady.
«eGov portaly arqyly ótinish berý – áleýmettik kómekke júginýdiń bir tásili ǵana jáne onyń avtomatty túrde taǵaıyndalýyna kepildik bermeıdi.
Kómek alýshy sanattardyń tizbesi, kómekti kórsetý sharttary jáne qajetti qujattar tizimi ár óńirde máslıhattar tarapynan jeke-jeke bekitiledi jáne jergilikti atqarýshy organdardyń resmı ınternet-resýrstarynda ornalastyrylady», delingen habarlamada.
Barlyq túsken ótinishter jergilikti atqarýshy organdarda belgilengen tártippen qaralady.
Sala mınıstrligi azamattardy aqparatty tek resmı derekkózderden alýǵa shaqyryp, jalǵan aqparat taratý zań boıynsha jaýapqa tartylatynyn eske salady.
