Klınıkalyq-dıagnostıkalyq zerthana qalqansha bezine qatysty taldaýlar nátıjesin túsindiretin zııatkerlik júıeni iske qosty. Bul – zerthanalyq dıagnostıka salasyndaǵy tyń qadamdardyń biri. Jańa servıs zertteý qorytyndysyn jasandy ıntellekt tehnologııalary arqyly qarapaıym ári túsinikti tilde tarqatyp berýge múmkindik ashady.
Júıe qalqansha bezi qyzmetiniń negizgi kórsetkishteri sanalatyn tıreotropty gormon (TTG) men erkin tıroksınniń (erkin T4) mánderin jedel taldaýǵa kómektesedi. Algorıtm halyqaralyq klınıkalyq usynymdarǵa súıenip jumys isteıdi. Nátıjesinde qurylymdalǵan esep daıyndalyp, onda kórsetkishterdiń maǵynasy, aýytqý sebepteri men aldaǵy qadamdar jónindegi usynymdar qamtylady.
Zııatkerlik taldaýdy alýǵa TTG men erkin T4-ke bir mezgilde qan tapsyrý qajet. Esep zertteý qorytyndysymen qatar avtomatty túrde jasalyp, paıdalanýshynyń jeke kabıneti men mobıldi qosymshada qoljetimdi bolady.
Joba tájirıbeli endokrınolog dárigerlerdiń qatysýymen ázirlengen, dáleldi medısına qaǵıdattaryna negizdelgen. Servıs tek baǵyt-baǵdar berip, tekserý nátıjesin durys uǵynýǵa járdemdesedi ári dáriger qabyldaýyna daıyndyqty jeńildetedi. Degenmen ol mamannyń medısınalyq qorytyndysyn almastyrmaıdy.
Jasandy ıntellektini engizý zerthanalyq dıagnostıkany sıfrlyq jańǵyrtý jolyndaǵy strategııalyq qadam sanalady. Aldaǵy kezeńde áleýmettik mańyzy joǵary zerthanalyq baǵyttardy qamtıtyn jańa zııatkerlik túsindirý tetikteri kezeń-kezeńimen iske qosylmaqshy.
