21-23 qańtar kúnderi ótken aımaqtyq irikteý kezeńinde top jaryp, Orta Azııa chempıonatyna joldama alǵan búldirshinder bul joly da úmitti aqtady. 4-6 jas aralyǵyndaǵy balalar arasynda uıymdastyrylǵan «Discover» baǵyty boıynsha robototehnıka saıysynda olar naǵyz sensasııa jasady deýge bolady. Baıqaýdyń aýqymy keń. Máselen, 13 elden 5 myńnan astam komanda qatysyp, solardyń ishinen úzdik dep tanylǵan 20 komanda fınaldyq kezeńde baq synasqan. Osyndaı tartysty dodada Kókpektiniń kishkentaı órenderi jobalaryn qazaq jáne aǵylshyn tilderinde erkin qorǵap, joǵary daıyndyqtaryn kórsetti. Nátıjesinde komanda «Presentation of the Day Award» – «Kúnniń eń úzdik tanystyrylymy» atalymyn jeńip alyp, Bas júldeni ıelendi. Bul tek balabaqsha ujymy úshin ǵana emes, búkil aýdan úshin zor maqtanysh deıdi jetekshileri.
Jeńimpaz búldirshinderdi atap aıtsaq, olar Bekzat Orynbekov, Iаsmına Orynbekova, Nurasyl Qalıev, Káýsar Amangeldi, Bekasyl Saılaýǵazy. Al komanda jetekshileri – Baqytbek Orynbaev, Aısulý Esimhanova, Gúljanat Qalıeva, Oljas Saqtaǵan, Nazym Kelerbekova, Gúlim Talǵatqyzy.
Aýyl balalarynyń halyqaralyq deńgeıde baq synaýyna múmkindik jasap, úlken sapardy uıymdastyrǵan balabaqsha meńgerýshisi Aınur Altaıqyzynyń eńbegi zor ekenin aıta ketken jón. Sonymen qatar, Talantty búldirshinderdiń ata-analaryna osy saparǵa demeýshilik jasap, qoldaý kórsetken Kókpekti aýdanynyń jeke kásipkeri Arnur Máýithanovqa alǵystaryn bildirdi.
«Bul Abaı oblysynyń, ásirese Kókpekti aýdanynyń bilim salasyndaǵy aıtýly jetistigi. Kishkentaı qadamnan bastalǵan úlken jeńis – bolashaqtyń jarqyn kepili», deıdi Aınur Altaıqyzy.
