Gúlshara ÁBDIQALYQOVA,
Qazaqstan Respýblıkasynyń Memlekettik hatshysy:
Qazaqstan jasampazdyqtyń jańa kezeńinde
Sársenbi kúni Qazaqstan Prezıdenti Nursultan Nazarbaev Prezıdent, Parlament jáne Úkimet arasynda ókilettikterdi qaıta bólý máselelerine baılanysty qazaqstandyqtarǵa Úndeý arnady. Memleket basshysynyń atap ótkenindeı, osynyń barlyǵy memlekettik atqarýshy organdar men olardyń jetekshileriniń jaýapkershiligin arttyrý maqsatynda jasalyp otyr. Ol el Konstıtýsııasy men zańdarǵa ózgerister engizýdi qajet etedi. «Aldaǵy reforma bizdiń damýymyzdyń qısyny men tutastaı qazirgi zamanǵy damý qısynyna arqa súıeıdi, – dep atap ótti Elbasy Úndeýde. – Negizgi máni – Prezıdent óziniń birqatar ókilettigin Parlament pen Úkimetke beredi... Parlamenttik saılaýlarda jeńiske jetken partııa Úkimetti jasaqtaýǵa sheshýshi túrde yqpal etetin bolady». Bılik tarmaqtarynda ókilettikterdi qaıta bólýshilik jaýapkershilikpen birge, saıası básekelestik te ákeledi. Bul demokratııalyq jáne quqyqtyq memleketti ári qaraı damytýda mańyzdy qadam bolyp tabylady. Elimiz bıylǵy jyly kezekti tarıhı belesine bet burdy. Qazaqstan jan-jaqty jańarý men jasampazdyqtyń shırek ǵasyrlyq jańa kezeńine kóshýde. Júrip ótken alǵashqy 25 jyldyq kezeń Táýelsiz Qazaqstan Respýblıkasynyń qurylýy men qalyptasýynyń negizgi nátıjelerimen salmaqtanady. Bul beleste elimizdiń naryqtyq ekonomıkasy men demokratııalyq saıası júıesi ornyqty, órkenıetti qoǵamy qalyptasty, jahanǵa qýatty memleket retinde tanyldyq. Endigi jerde ýaqyt kerýeni aldymyzǵa jańa keleli mindetter qoıýda. Bul mindetter Elbasy Nursultan Nazarbaev belgilep bergen strategııalyq baǵyttardan týyndaýda ári kóz ilespes jyldamdyqpen damyp kele jatqan jahandanýdyń tegeýrindi tolqynyna ilesýge baǵdar usynyp otyr. Sondyqtan, Elbasy usynǵan konstıtýsııalyq reformanyń jobasy óziniń ózektiligimen ári tereńdigimen erekshelenetin asa qundy bastama. Aıtalyq, memlekettik bılik tarmaqtarynyń ókilettikterin qaıta bólýge qadam basýymyz – memlekettiń, ekonomıkanyń jáne qoǵamnyń qol jetkizgen damý deńgeıin sezinýdiń naqty nátıjesi, eldiń odan ári yrǵaqty damýyna baǵyttalatyn aýqymdy shara. Sonymen birge, álemdik damýdyń basty trendi – ınklıýzıvti jahandaný bizden ýaqyttyń kúrdelengen syn-tegeýrinderine qatysty tolymdy jaýap qaıtarýymyzdy tabandy túrde talap etýde. Buǵan qosa, «Qazaqstan-2050» Strategııasynyń negizgi maqsattaryna qol jetkizýde, sondaı-aq álemniń eń ozyq 30 eliniń qataryna kirý úshin ekonomıkalyq jáne áleýmettik-mádenı damý jolyndaǵy saıası qondyrǵyny jańartý qajettigin ýaqyttyń ózi alǵa tartýda. Konstıtýsııalyq reformalar jobasyn búkilhalyqtyq talqylaýǵa shyǵarý elimizdi qazirgi zamanǵy demokratııa jolyna bastap kele jatqan Elbasynyń asa joǵary saıası deńgeıin aıǵaqtaıdy. Osy arqyly Qazaqstan álemdik qoǵamdastyqtyń bedeldi ári tanylǵan memleketi, BUU Qaýipsizdik Keńesiniń turaqty emes múshesi retinde barsha jurtshylyqqa órkenıetti damýǵa senimdi de zerdeli ári batyl qadam basyp otyrǵanyn taǵy da aıqyndap berip otyr.
