AQSh-taǵy óndiristiń artýy munaı baǵasyn arzandatyp jiberdi

AQSh-taǵy burǵylaý qurylǵylarynyń kóbeıýi búgin tańerteńgi saýda sessııasynda munaı baǵasyn arzandatyp jiberdi, dep jazady investing. Astana ýaqytymen 12.27-de Brent markaly munaı quny 0,11 paıyz arzandap, 55,17 dollarǵa teńesti. AQSh-taǵy burǵylaý qurylǵylarynyń sany bir aptada 15-ke kóbeıip, jalpy sany 566-ny qurady. Bul 2015 jyldan bergi eń joǵarǵy kórsetkish. Sarapshylardyń pikirinshe, AQSh-taǵy munaı óndirisiniń kóbeıýi OPEK+ elderiniń byltyr jyl sońynda qabylǵan óndiristi azaıtý týraly kelisimine keri áserin tıgizip, naryqtaǵy qara altyn baǵasynyń kóterilýine kedergisin keltirmek. Osy oraıda, sala mamandary 2017 jyly qara altynnyń bir jyldyq ortasha baǵasy 57,75 dollar, al 2018 jyly 71,75 dollar bolady dep boljaýda. AQSh-taǵy munaı óndirisi 2016 jyldyń ortasynan beri 6,3 paıyzǵa kóbeıdi. Goldman Sachs bankiniń málimetinshe, Amerıkalyq munaı óndirisi 2017 jyly orta eseppen táýligine 290 000 barrel ósim kórsetpek.