Alına RAIKOVA: Asqaraly maqsat altyn mejege jetkizedi!

Qaı deńgeıdegi jarysta bolsyn, el quramasy­nyń qorjynyna alǵashqy altyn júldeni sal­ǵan sportshy kóptiń esinde erekshe qalady. О́ıt­keni, onyń súıinshi habary da erekshe ǵoı. Jáne, árıne, altynnyń aty – altyn. Táýel­siz Qazaqstanda ótip jatqan Ýnıver­sıa­da­nyń alǵashqy altyn júldesine otandyq sport­shy­lardan alǵash bolyp bıatlonshy Alına Raıkova ıe boldy. Saıys sońynan ótken baspasóz máslıhatynda jeńimpaz jerle­simiz­ben az-kem suhbattasýdyń sáti túsip edi. – Alına, jeńisińiz qutty bolsyn! О́zińiz aldyn ala senimdi me edińiz? – Rahmet. Senimdi bolǵan joqpyn. Bıyl syrqattanýyma, taǵy bir sebepterge baılanysty Ýnıversıadaǵa ázirligim aıtarlyqtaı emes edi. Sondyqtan meniń bul jolǵy negizgi maqsatym top jaryp, birinshi kelý emes, óz boıymdaǵy osaldyqty jeńý edi. Búgin sol kózdegenime jet­kenime qýanyshtymyn! – Jarys kezinde qıynshylyqtar boldy ma? – Jarys barysynda 15 km joldy durys júrip ótý, dál kózdep atý ońaıǵa soqqan joq. Fızıkalyq turǵydan tózimim taýsylyp, qolymdy bir siltegim kelgen sát te boldy. Biraq, sanam, nátıjeni oılaǵan kóńilim olaı jasatpady, aqyl shirkin emosııaǵa boı aldyrǵan joq!.. Basty mindetim óz-ózimdi jeńý edi. Aldyńa maqsat qoıa bilseń, armandaı bilseń jáne soǵan umtyla bilseń, bári de múmkin eken. Iаǵnı, asqaraly maqsat altyn mejege jetkizedi! – Sizderdiń jarysqa aýa raıynyń, jer jaǵdaıynyń áseri boldy ma? – Bizge júrip ótý júktelgen trassa álemdik bıatlonda eń qıyn sanalatyn joldardyń biri. Onyń ústine, osy kúni kún raıy da tym qolaısyz boldy. Qar jaýyp, jel de birese ońnan, birese soldan soǵyp, ár adymdy qıyndatyp jiberdi. Kidirissiz júgirip otyrý úshin asa abaı bolý qajet edi. Al jarys márege taıaǵanda aınalany tuman basty. Áıteýir ne kerek, jarys úlken qıyndyqpen ótti. Onyń taýly, qyratty jerde ótkenin eskerseńiz, qalaı qaljyraǵanymyzdy ózińiz baǵamdaı berińiz. – Bul sizdiń sporttaǵy eń úlken jeńisińiz be? О́zińizdiń bıatlondaǵy myqty jáne osal tustaryńyzdy ataı alasyz ba? – Joq. Men 2015 jyly ótken qysqy Ýnıver­sıadada da altyn júldeger boldym. 2014 jyly Qazaqstan quramasynyń sapynda Sochı Olım­pıadasyna qatystym. Bıatlonda men kózdep atýǵa shebermin deı alamyn. Osal jaǵym degende, shańǵymen júgirý jaǵyn áli de shyńdaýym kerek. Sodan keıin óz-ózimdi qaırap, ózime degen senimimdi arttyra túsýim qajet dep oılaımyn. – Quramadaǵy áriptesińiz Galına Vısh­nevskaıa týraly pikirińiz? – Galına Vıshnevskaıa salǵannan top jaryp, kósh bastaǵanmen, qapyda qulap qalyp, sonyń ózinde máre syzyǵyn ekinshi bolyp qıdy. Ol áli talaı bıikterden kórinerine kúmánim joq. – Áńgimeńizge rahmet! Bolatbek QAÝYSOV