Málimdeme maqsaty – mámile

Keshe OSK shyǵarǵan aldyn ala qorytyndy boıynsha saılaýda 1,4 % paıyz daýys jınaǵan Halyqtyq Kommýnıster partııasynan prezıdenttikke úmitker Jambyl Ahmetbekov Ulttyq baspasóz klýbynda saılaýdan keıingi qorytyndy baspasóz máslıhatyn ótkizdi. Onda ol óz partııasy atynan Elbasyny quttyqtap, úndeýin jarııalady. Bul saılaý ótken saılaýlarǵa uqsamaıtyn ózindik sıpatymen erekshelenedi, delingen málim­demede. Mańyzdylyǵy jaǵynan jaı ǵana saılaý bolyp qoıǵan joq. Bul memlekettik bılik jú­ıesiniń ómirsheńdigine, onyń qa­zirgi zamanǵa jáne óz halqynyń múddesine sáıkes keletindigine berilgen baǵa boldy. Osyndaı saıa­sı jaǵdaıda Nursultan Nazar­baevtyń jeńisi bir ǵana elek­toraldy merzimde daıyn bolýy múmkin emes edi. Bul jaǵdaıda halyq seniminiń negizi tereńnen bas­taldy jáne oǵan biz kýá boldyq. Ortalyq saılaý komıssııasy jarııalaǵan daýys berý nátı­je­leri naqty shyndyqty obektıvti túrde kórsetip otyr. Muny mo­ıyndaýymyz qajet. Jalpy al­ǵan­da elektoraldy is-shara elimizdiń zańnamalaryna sáıkes ótkizildi deı alamyn. QHKP atynan túsken maǵan buqaralyq aqparat qural­daryna, sonyń ishinde elektrondy BAQ-tarǵa shyǵýyma jáne saı­laý­shylarmen kezdesýime eshqan­daı bógetter bolǵan joq. Meniń halyqpen bolǵan saı­laýaldy kezdesýlerden túıgen basty nársem – eldiń bılikten túbegeıli áleýmettik ózgeristerdi kútýinde. Azamattar óz taǵdyr­la­ryn jasaýǵa memlekettiń arala­sýyn talap etýde. Meniń saılaý aldy baǵdarlamam osy máse­le­lerdi sheshýge arnaldy. Sondyq­tan men memlekettik saıasatta qarapaıym halyq úshin áleýmet­tik kúrt ózgeristerdiń bolaty­nyna senimdimin, dedi ol. Jas saıasatkerge prezıdenttik saılaý úlken synaq, ári kásibı turǵyda qalyptasý jolynda táji­rıbe jınaqtaý ekeni ras. Saılaý naýqany maǵan halyqpen tikeleı suhbattasýǵa, olardyń kóńil-kúıin, búgingi máselelerin óz kó­zimmen kórýge, senimine úmit otyn oıatýyma múmkindik berdi. Eli­mizdiń barlyq aımaqtarynda bo­lyp, myńdaǵan adamdarmen júz­deskennen keıin múldem basqa adam bop shyqqanymdy sezinemin. Saıasatkerlik jaýapkershilik sezimnen bastalady. Iаǵnı, óz sózińe, is-áreketterińe, senim artqan adam­darǵa jaýap berý. Saılaý kampanııasy kezinde meni qoldap, maǵan daýys bergen halyqqa, turaqtylyqty teriske shyǵar­ma­ǵandarǵa alǵysymdy bildiremin. Bolashaqta saılaýshylar senimin bir ǵana tásilmen, óz prınsıpterimdi naqty ustanyp, únemi qara­paıym halyqtyń múddelerin qorǵaý arqyly aqtaı alamyn, dedi ol óz sózinde. *** Keshe elordadaǵy Ulttyq baspasóz ortalyǵynda «Aýyl» sosıal-demokratııalyq partııasynyń tóraǵasy Ǵanı Qalıev sóz sóılep, bul uıym is ústindegi Prezıdenttiń kandı­datý­rasyn qoldap daýys bergendigin málimdedi. «Qazaqstan sosıal-demo­kra­tııa­­lyq «Aýyl» partııasy osy saı­laý­dyń qorytyndysyn tolyq qoldaı­tyndyǵyn bildire otyryp, Nur­sultan Nazarbaevty joǵarǵy bılikke qaıta saılanýymen qut­tyq­taıdy, dep bastady sózin Ǵ.Qalıev. Osy saılaýdyń jaýapkershiligi men mańyzdylyǵyn tú­sine otyryp, «Aýyl» partııasy músheleri demo­kratııalyq kúshter qaýymdas­ty­ǵyna qosyldy. Nur­sultan Ábish­uly Nazarbaevtyń kandıdatýrasyn qoldaı otyryp, biz aýylda turatyn kópshilik qa­ýymnyń oıyn bildirdik dep oılaımyz. Biz elimizdiń turaqty da­mýy­na, dúnıejúzilik báseke­les­tik­ke shyǵýyna, halqymyzdyń ósip-órkendeýine shynaıy senimdemiz. Bul kezekten tys prezıdenttik saı­laý elimizdiń zańdaryna sáı­kes ótti jáne saılaýaldy úgit-na­sıhat jumystaryn júrgizýde bar­lyq kandıdattarǵa birdeı jaǵdaı jasaldy dep esepteımiz. Aýyldyq jerdegi saılaýshy­lar­dyń joǵarǵy belsendiligi, óz­de­riniń kelesheginiń, ál-aýqat­ta­ry­nyń jaqsarýyn Nursultan Ábish­uly Nazarbaevpen baı­la­nys­tyratyndyǵyn dáleldeıdi. El kóshbasshysynyń bas­shy­ly­ǵymen elimiz odan ári órken­dep, saıası-ekonomıkalyq ahýaldy jaq­sartý, demokratııalyq úrdis­terdi damytý, eldegi saıası refor­ma­lardy jańǵyrtý baǵytyndaǵy ju­mystardy odan ári jal­ǵas­ty­rady dep senemiz, delingen partııa tóraǵasy oqyǵan málim­demede. *** Saılaý ótken kúnniń ertesinde elordada «Ádilet» demo­kratııalyq partııasynyń teń tóraǵasy Maqsut Nárikbaev málimdeme jasady. «Ádilet» partııasy «Qazaqstan -2020» koalısııasynyń múshesi retinde elimizdiń mıllıondaǵan azamattarymen birge qazirgi Prezıdent Nursultan Nazarbaevtyń ókilettigin sozý týraly refe­ren­dýmdy qoldaǵan bolatyn dedi. Biraq, óziniń demo­kra­tııalyq qundylyqtarǵa adal ekendigin bildirgen Elbasy, merziminen buryn prezıdenttik saılaý ótkizý týraly sheshim qabyldady. Bul sheshim de bizdiń partııa tara­pynan qoldaý tapty. Prezıdenttiń kandıdatýrasyn belsene qoldaý úshin saılaýaldy naýqanyna tikeleı qatysqan ádi­let­tikter jurshylyqty áleýmet­tik turaqtylyqqa, qoǵamdyq kelisimge, ulttyq birlikke, halyqtyń turmys jaǵdaıyn kóterýge, eli­mizdiń odan ári de osy qalyppen turaqty damı berýine jáne Qa­zaq­stan Respýblıkasynyń Tuń­ǵysh Prezıdenti, Elbasy júr­giz­gen 20 jyldyq syndarly saıa­sattyń arqasynda Qazaqstannyń jetken jetistikteri úshin daýys berýge shaqyrdy. Keshegi prezıdenttik saılaýda Nursultan Nazarbaevtyń aıqyn basymdylyqpen jeńiske jetýi – búkil halyqtyń Elbasy saıasatyn tolyq qoldaıtynyn dáleldep qana qoımaı, referendým ótkizý týraly bastamanyń qanshalyqty ómirsheń bolǵandyǵyna da kóz jetkizdi. Biz osy saılaý arqyly referendým týraly bastamanyń negizgi maqsatynyń is júzine asqandyǵyna kýá boldyq. Saılaý nátıjesinen Qazaqstan halqynyń Nursultan Nazarbaevtyń el al­dyndaǵy tarıhı rólin shynaıy baǵalaıtyndyǵyn jáne oǵan degen qurmet pen senimniń odan ári arta túskendigin eshbir kúmánsiz baıqaýǵa bolady. Osy saılaýda bir kisideı jumyla daýys bergen qazaq­stan­dyqtar alda turǵan asa iri eko­nomıkalyq jáne áleýmettik damý jolymen qatar, qazirgi kezeńdegi zamana talabyna saı túbegeıli saıa­sı reformalarǵa da bar kúshi men jigerin aıamaıtyndyqtaryn pash etti. Aldymyzda aýyrtpalyǵy zor, mańyzdylyǵy mol qyrýar ister men asqar asýlar asatyn uly kósh kútip tur. Kósh kómbesine óz tańdaýymyzdyń ıesi – Elbasy bireý, basqalarymyz oǵan tireý bolyp jeteıik! Venera TÚGELBAI.