Prezıdentpen birge, alǵa!

Elbasy jeńisi –  asylyn ardaqtaı alǵan, erin qoldaı bilgen eldiń de eren jeńisi, Elbasy júrgizgen sarabdal saıasattyń saltanaty. Qýana biletin halyqpyz ǵoı. Ortaq jeńisimiz qutty bolsyn, áleýmet!

Keshe Astanada Qazaq­stan Respýblıkasynyń kezekten tys prezı­denttik saı­­laý­ynda Memleket bas­shy­sy Nursultan Nazar­baev­­tyń aıqyn basym­dyq­pen jeńiske jetýine baı­la­nysty «Elbasymen birge, alǵa!» atty forým ótti.

«Qazaqstan» sport kesheninde bolǵan bul sharada Elbasy myń­da­ǵan jastar, Úkimet músheleri, Parlament depýtattary, máde­nıet jáne óner, sport qaırat­ker­le­riniń aldynda halyqqa saılaýda ózine qoldaý kórsetkeni úshin alǵysyn bildirdi. Osy kúni sport saraıynda or­natylǵan sahna tórine qaıta saı­lanǵan Prezıdent N.Nazarbaev, onyń qoǵamnyń barlyq salasyn­da qyzmet etip júrgen seriktesteri shyǵyp, elimizdiń bolashaǵy – jastar aldynda sóz sóılep, saı­laýdyń qorytyndysyna baı­la­nysty ystyq yqylastaryn ta­nytty. Sport kesheninde qaýma­la­ǵan jurtshylyqtyń qoldaryna elimizdiń kók baıraǵyn ustap, «Jasa, Qazaqstan!», «Nursultan – Qazaqstan!» dep Elbasyna shy­naıy sezimderin bildirgen uran­dar­dan qulaq tunady. Osy kezde Memleket basshysy sport sa­raıy­nyń sahnasyna jaqyndap, jı­nalǵan kópshiliktiń qoldaryn alyp joǵaryǵa kóterildi. – Qurmetti forýmǵa jınalǵan qaýym, meniń qanattastarym! – dep bastady sózin sahnaǵa shyq­qan Elbasy. – Búgin Otany­myz­dyń tarıhyndaǵy taǵy bir eleýli kezeńde turmyz. Elimizdiń 20 jyl­dyǵyn atap ótetin jyly saılaý ótkizip, tórtkúl dúnıeniń na­za­ryn Qazaqstanǵa aýdardyq. Ashyq, ádil bolǵan báseke ná­tı­je­sinde Qazaqstan saılaýshyla­ry­nyń 90 paıyzdan astamy meni qoldap, daýys berdi. Bul jeńis bar­lyǵymyzdyń jeńisimiz! Qazaq halqynyń jeńisi! Qazaqstan­dyq­tardyń jeńisi! Elbasy sózin ári qaraı sa­baq­taı kelip, saılaý nátıjesinde Qa­zaqstannyń, qazaq halqynyń qazirgi jaǵdaıy nyq ekenin, eldiń ishinde birlik saqtaıtyn, bola­sha­ǵyn oılaıtyn, beıbitshil el ekenin kórsetkenin atap ótti. «Qa­zaq­stan halqy óziniń bolashaǵyna ne­gizdelgen el ishindegi birlikti saq­taıtyn dúnıe júzine órke­nıet­ti memleket ekenin taǵy da bir kórsetti, – dedi ol. – Ashyq, jarııaly túrde ótkizilgen saı­laýǵa 1059 shet el baıqaýshysy, 200 shet el jýrnalısi qatysyp, eshkim eshqandaı kemshilik taba almady, bári saılaý zańdy ótti dep baǵa berdi». Elbasy odan keıin qazaq ta­rıhynda altyn árippen jazyla­tyn táýelsizdik uǵymynyń mán-ma­ńyzyna toqtaldy. Munda ol ózimen qatarlas urpaqtyń peshenesine qazaq memlekettiligin qu­rý, ony órkenıetti eldermen terezesi teń etý, ekonomıkany da­my­tý, halyqtyń ál-aýqatyn jaq­sartý jazylǵanyn, osynyń ózi tarıhtyń bergen úlken syıy, qur­meti dep bilý kerektigin aıtty. Osylaı jastardyń aldynda azattyqtyń mańyzdylyǵy jónin­de oılarymen bólisken Nur­sul­tan Ábishuly odan ári 3 sáýirde ótken kezekten tys prezıdenttik saılaýda ózine qoldaý kórsetken halyqqa alǵys sezimin bildirdi. Osy oraıda ol ózine senim bildirgen qazaq halqyna, barlyq qa­zaq­standyqtarǵa, qoǵamdyq shtabqa, «Qazaqstan-2020» jalpyulttyq demokratııalyq kúshter koalı­sııa­syna, 29 myń senimdi ókilderi men jáne árıne, 88 myń vo­lon­terǵa alǵysyn jetkizdi. «Ási­re­se, – dedi Elbasy, – meni jas­tar­dyń belsendiligi qýantady. Biz qazaqtyń bolashaǵy úshin jumys istep jatyrmyz. Meniń kúndiz-túngi jumysym osyǵan arnalǵan, oıym da, aqyl-parasatym da, tájirıbem de sol maqsatqa arna­lady. Al bolashaq – jastarda». Sonymen birge, ol kezekten tys prezıdenttik saılaýǵa qatysqan úmitkerlerdiń bárine alǵys aıta­tynyn, olarǵa saılaý aldynda ózine daýys jınaý úshin barlyq múmkindikterdiń berilgenin, saılaý shtabtary elimizdiń túkpir-túkpirinde úzdiksiz jumys istegenin atap ótti. Osylaı deı kelip Elbasy úmitkerlerdiń bárine teń múmkindik jasalyp, halyqtyń 90 paıyzdan astamy saılaýǵa qaty­syp, solardyń basym kópshiligi qazirgi Prezıdentke daýys bergeni Batys elderi úshin sensasııaǵa balanatynyn, osynyń ózi elimiz­diń birligi men tatýlyǵyn bildiretinin, osy halyqtar arasyn­da­ǵy dostyq pen yntymaqtas­tyq­tyń arqasynda dúnıe júzinde ult­aralyq qaqtyǵystar bolyp jatsa, bizdiń elimizde barlyq ulttar men ulystardyń birligi saq­talyp otyrǵanyn málimdedi. Kelesi kezekte Nursultan Ábish­uly jurtshylyqtyń naza­ryn elimizde júrgizilip jatqan áleý­mettik-ekonomıkalyq saıasat­qa aýdartty. «Keıbir elderde jumys oryndary qysqartylyp, zaýyttar toqtatylyp jatsa, biz­diń elimizde kerisinshe, halyq ju­mys­pen qamtamasyz etilip, jańa kásiporyndar ashylýda. Keıbir elderde zeınetaqy, jalaqy aza­ıyp jatsa, bizdiń elimizde kó­beıýde. Mine, biz ári qaraı osy jolmen júrip, halyqtyń áleý­mettik-turmystyq jaǵdaıyna basa nazar aýdaratyn bolamyz», – dedi Prezıdent. Osyǵan baı­lanysty El­ba­sy aldaǵy kezde elimizde ın­dýs­trııalyq-ınnova­sııalyq baǵ­darlamany júzege asyryp, aýyl sharýashylyǵyn da­mytyp, áleý­mettik salany qaıta jandan­dyryp, bilim berý men densaýlyq saqtaý salasyn qoldaý maqsa­tynda kóptegen jumystardyń istelinetinin atap kórsetti. Ol aza­mattarǵa kómek kórsetý úshin bar­lyq múmkin­dikterdiń qarastyry­la­tynyn, aýyldyq jerlerde sha­ǵyn nesıeler berilip, jumys­syz­dardy oqytyp, olardyń maman­dyq alý úshin jaǵdaı jasalaty­nyn jetkizdi. Elbasynyń sózinen keıin forým sheńberindegi sharalar odan ári jalǵasty. Sahnada «MýzArt» trıosy, Eskendir Hasanǵalıev, Roza Rymbaeva, Nurǵalı Núsip­janov sııaqty ánshiler «О́z elim» ánin oryndap, jınalǵan jurt­shylyqtyń jigerine jiger qosty. Odan ári elimizdiń barlyq óńir­lerinen kelgen qoǵam qaırat­kerleri atynan  Parlament Máji­lisiniń depýtaty, Qazaqstan hal­qy Assambleıasynyń múshesi Ro­za­qul Halmuradov, Aýǵan soǵysy ardagerleri uıymdary assosıa­sııa­synyń tóraǵasy Baqytbek Smaǵul, Shákárim atyndaǵy Semeı memlekettik ýnıversıtetiniń rektory Erlan Syzdyqov, jastar atynan S.Seıfýllın atyndaǵy Qazaq agrotehnıkalyq ýnıver­sıtetiniń stýdenti Ekaterına Homýtova sóz sóılep, Prezıdenttiń saılaýdaǵy jeńisine baılanysty óz oılaryn ortaǵa saldy. Parlament Májilisiniń depýtaty óz sózinde Elbasynyń bul jeńisine barlyq azamattardyń o bastan sengenin, Prezıdenttiń saılaý­daǵy jeńisi – el birliginiń, bo­la­shaǵymyzdyń jeńisi ekenin aıt­ty. «Sizdiń kemeńger saıasaty­ńyz­dyń arqasynda elimizdiń ynty­maǵy jarasyp tur. Eń bastysy, el aman, jurt tynysh. Osy 20 jylda jastarymyz qan tógisti kórgen joq. Bul da bolsa sizdiń kóregendigińizdi kórsetip tursa, sol úshin barlyq etnos ókilderi atynan Sizge shyn jú­regimnen alǵysymdy bildiremin. Siz búgingi tańda halqymyzdyń basyna qonǵan baǵysyz, sol ba­ǵy­myzdy qadirlep-qasterleı bileıik, aǵaıyn! Sizge zor den­saý­lyq, uzaq ómir tileı otyryp, birligimiz nyǵaıa bersin, Elbasy­myz­ben birge jeńisten jeńiske jete bereıik degim keledi», – dep atap kórsetti. Al Semeı ýnı­ver­sı­tetiniń rektory Erlan Sydyqov: «Biz osydan júz kún buryn referendým ótkizý týraly bastama kóterip edik. Sol sátte bes jarym mıllıon otandastaryńyz sizdiń saıasatyńyzdy qoldaǵan bolatyn. Biz búgin túpkilikti maq­satymyzǵa jetip otyrmyz. Ha­lyqtyń tilegi qabyl boldy, aǵaı­yn! Siz bizdiń ǵasyrlar boıy ar­man­daǵan táýelsizdigimizdi qurdy­ńyz, qazaq halqyn alǵa bastap kele jatyrsyz. Eldiń joǵaltqanyn túgendep berip otyrsyz. Arqa­nyń tórinde ádemi, sulý Astana turǵyzdyńyz. Dúnıe júzine Qa­zaqstannyń demokratııalyq el ekenin tanytyp, elimizdi álemdik deńgeıge kóterdińiz. Osynyń bári sizdiń eren eńbegińizdiń arqasy. Sondyqtan halqymyzdyń bári sizge biraýyzdan daýys berdi», – deı kelip, mundaıda qazaqtyń búgingi kúndi «Aq túıeniń qa­rny jarylǵan kún» deıtinin, kemeń­ger basshysy bar bizdiń elimizdiń baǵyty aıqyn, bola­shaǵy jarqyn ekenin aıtty. Jastar atynan sahnada turyp, tol­qyp sóılegen stýdent qyzdyń sózi de áserli shyq­ty. Ol saılaý kezinde Qazaqstan jastarynyń Elbasyǵa daýys bergenin, óıtkeni, táýelsizdik al­ǵan kezden beri Prezıdenttiń júrgizip kele jatqan saıasatymen ósken jastar óz bolashaǵyn qa­zirgi Memleket basshysymen baılanystyratynyn, jastardyń bári Elbasyǵa ǵana senip, onyń saıasatyna árqashan qoldaý kór­setetinin atap ótti. Aýǵan soǵy­synyń ardageri, jazýshy Baqyt­bek Smaǵul da Prezıdenttiń saılaýdaǵy jeńisine baılanysty alǵys sezimin bildirip, jyr joldaryn oqyp berdi. Ol Elba­synyń saılaýdaǵy jeńisi – alty alashtyń yqylasy men úkilegen úmiti ekenin, onyń qazirgi júrgi­zip otyrǵan saıasaty jeńimpazdar býynyn sabaqtastyryp jatqa­nyn jetkizdi. «Búgingi jeńis ózińizben birge qýanǵan, báıge atyndaı shu­balǵan, 20 jylda sy­nalǵan táýel­siz elimizdiń, táýel­siz jastary­myzdyń tól jeńisi!», – dedi ol. Jeńimpazdar forýmy odan ári Eskendir Hasanǵalıev, Roza Rymbaeva, Nurǵalı Núsipjanov, Bekbolat Tileýhan, «MýzArt» trıosy jáne basqa da ánshilerdiń «Atameken» ánin oryndaýymen, ony jınalǵan jurtshylyqtyń qoldaýymen jalǵasyn tapty. Dastan KENJALIN.