Vıse-prezıdenttikke Turlyhanov taǵaıyndaldy

Belarýs astanasy Mınsk qalasynda «Álemdik aýyr atletı­kanyń damýy jáne dopıngke qar­sy kúres» atty halyqaralyq sporttyq konferensııa ótti. Oǵan Halyqaralyq aýyr atletıka federasııasynyń prezıdenti Tomash Aıan jáne birqatar elderdiń federasııa basshylary qatysty. Delegattar arasynda Kahı Kahıashvılı, Aleksandr Kýrlovıch syn­dy birqatar dańqty ziltemirshiler boldy. Sol jıyn bary­synda Eýrazııalyq aımaqtyq aýyr atletıka qaýymdastyǵyn qu­rý jóninde bastama kóterilip, bul ıdeıa iske asty. Onyń quramyna 14 memleket kirdi. Olar – Armenııa, Ázirbaı­jan, Grýzııa, Belarýs, Qazaqstan, Qyrǵyzstan, Lıt­va, Moldova, Moń­ǵolııa, Túrki­men­stan, Reseı, Tájik­stan, О́zbekstan jáne Ýkraına. Jańadan qurylǵan uıymnyń tizginin reseılik Aleksandr Gerasımenko ustasa, vıse-prezıdenttikke Qa­zaq­stan Aýyr atletıka federasııa­synyń bas­shy­sy Qaırat Turly­hanov taǵa­ıyndaldy. – Árıne, osyndaı eki birdeı beldi uıymda basshylyq qyzmet atqarý men úshin úlken mártebe. Biraq «osynyń barlyǵyna ózim jettim» dep keýde qaǵýdan aý­laq­pyn. Barlyǵy da otandyq federasııa qyzmetkerleriniń, bapkerler men mamandar jáne sportshy­la­ry­­myzdyń ereń eńbeginiń arqa­sy. Bul kúnderi Qazaqstan zil­temir­shileriniń myqtylyǵyn kúl­li álem moıyndady. Biz  álemdegi ozyq komandalar qataryndamyz. Bul – maq­tanatyndaı-aq jáıt. Biraq bo­sańsýǵa bolmaıdy. Alda – London Olımpıadasy menmunda­lap tur. Elbasy jáne halqymyz­ sport­shy­lar qaýymyna, onyń ishin­de aýyr atletterge zor senim artýda. Týrızm jáne sport mınıstrligi men «Samuryq-Qazyna» ult­­tyq ál-aý­qat qory bizge barynsha qoldaý kór­setýde. Olaı bolsa, senim úde­si­nen shyǵý úshin eńbek­teneıik, izdeneıik, ter tógeıik, – dep Qaırat Turlyhanov aqtaryla sóıledi. Daıyndaǵan Dastan KENJALIN.