«Nursultan balamnyń joly nurly bolsyn!»

105 jastaǵy aqtaýlyq ananyń aq batasy

Endi bir jyldan soń jarty ǵasyrlyq mereıtoıy atalyp ótetin Aqtaý – jastar qalasy degendi jıi estýge bolady. Shyndyǵynda solaı. Shahar óndiristi meken. Jalyndaǵan jastar qalany alyp qurylystar alańyna aınaldyryp ta otyr. Degenmen, kúni keshe ótken kezekten tys prezıdenttik saılaýda qaladaǵy ardagerler men qadirmendi qarııa­larymyz belsendilikterimen el nazaryn ózderine aýdardy. №140 saılaý ýchaskesinde 96 jastaǵy Raýshan Imanbaeva apamyz birinshi bolyp daýys bergenin kórip, ol kisiniń júrisi shıraq, sózi zerdeli ekendigine rıza bolǵanbyz. Sol sátte qala ákimi Ospan Qazaqbaev qaladaǵy eń qart saılaýshy ananyń bar ekendigin jáne ol №42 saılaý ýchaskesine ózi baryp daýys beretindigin aıtyp qalǵan-dy. Anyqtaı kele ol 105 jastaǵy Názıhan Bekejanova apaıymyz bolyp shyqty. Ertesine ǵasyr jasaǵan anamen jáne bala, kelinderimen kezdesip áńgimelesýdiń sáti tústi. Bizdi ananyń kenje balasy Otan men kelini Jańyl qarsy aldy. Anasy bar adamdar qartaımaıdy demekshi, alpysty alqymdaǵan kenje uly Otan jastaý kórindi. Munaı kompanııasynda júrgizýshi bolyp jumys jasaıdy eken. Ol Isan, Danııar atty aǵalary men Asyl atty apaıy týraly da áńgimelep, ózderinen órbigen 17 nemere, 30 shóbere, 4 shópshektiń ǵasyr jasaǵan ananyń qýanyshy men qyzyǵy ekendigin aıtty. Apaıdy baǵyp, qarap otyrǵan nemere bala-kelini Bereke men Gúlsim bolyp shyqty. Osy kisiniń jaǵdaıy úshin muǵalimdikti de ázirge jartylaı jasap júrmin, – deıdi Gúlsim qaryndasymyz. Áńgimesine qaraǵanda, Názıhan apaıymyz turmysqa erteleý, ıaǵnı 14 jasynda shyǵypty. Eri Seıitmuhan balyqshy bolǵan. Uly Otan soǵysy kezinde kún-tún demeı teńizde aılap júrip maıdan úshin, Jeńis úshin jumys jasapty. Átteń, ómirden erte ótipti. Tórt bala tárbıesin Názıhan apa atqarǵan. Kúnkóris qamymen balyqshy da, qurylysshy da, shópshi de bolypty. Biraq ta osy jasqa deıin birde-bir ret aýyryp emdelgen kezin esine túsire almady. Taǵy bir keremeti, namaz oqýdy 9-10 jasynda bastapty. Áńgime keshe ótken prezıdenttik saılaýǵa aýysty. 105 jasynda saılaý ýchaskesine ózi baryp azamattyq mindetin ótegen asyl anany qajymas qaıraty, paıymdy parasattylyǵymen elimizdi bereke-birliktiń altyn-uıasyna aınaldyrǵan táýelsiz Qazaq eliniń Tuńǵysh Prezıdenti Nursultan Nazarbaevtyń halyqtyń teńdesi joq qyzý qoldaýyna ıe bolyp qaıtadan el Prezıdenti bolyp saılanǵanymen quttyqtadyq. Osy tusta nemere kelini Gúlsim aldyńǵy kúni №42 saılaý ýchaskesine daýys bere barǵandaryndaǵy anaǵa degen halyqtyń qoshemeti, A.Isaeva bastaǵan ýchaskelik komıssııa músheleriniń qurmeti men aımaqqa tanymal kásipker azamat Mereke Dúısenbaevtyń syı-syıapat jasaǵanyn rızashylyqpen jetkizdi. Anamyz áńgime arasynda «adal» degen sózdi jıi qaıtalady. Kezdesý sońynda ǵasyr jasaǵan asyl ana mańǵystaýlyqtar atynan elin súıgen, eli súıgen «Nursultan balama berer batam bar degen-di. Ol bylaı edi. – Nursultan balamyzdyń joly bolsyn! Meniń jasymdy bersin. Adal eńbegi jana bersin, abyroıly bolsyn! Erimizdi, jerimizdi Pir Beket atanyń árýaǵy qoldasyn! Áýmın!». Al biz ǵasyr jasaǵan asyl ananyń osynaý aq batasyn elimizdiń bas gazeti arqyly kópshilikke jetkizýdi maqsat ettik. Jolaman BOShALAQ, Aqtaý.