«Barys» QHL-diń pleı-off kezeńine shyqty

Qurlyqtyq hokkeı lıgasynyń turaqty chempıonatynda Astananyń «Barysy» óz aıdynynda Novosibirdiń «Sıbır» komandasyn qabyldap, 2:1 esebimen basym tústi. Kezdesýdiń 8-mınýtynda «Sıbır» hokkeıshisi Kırıll Vorabev qaqpany dál kózdep, esep ashty. Alaıda, baryn salyp, alǵa umtylǵan astanalyqtar 14-mınýtta-aq tarazy basyn teńestirip úlgerdi. Bul rette Dastın Boıdtyń soqqysyna qonaqtar qarsy tura almady. Osydan keıin qalǵan eki kezeńde birqatar shabýyl uıymdastyrylǵanmen, esep ózgerissiz qaldy. Degenmen, overtaımda Naıdjel Doýs mergendigimen tanylyp, komandasyna jeńis syılady. Qorjynynda 89 upaıy bar «Barys» «Shyǵys» konferensııasynda 5-orynda keledi. Al 9-orynda turǵan «Sıbırmen» qazir on upaı bólip tur. Demek, Edýard Zankoves shákirtteri qalǵan eki kezdesýde jeńilse de, pleı-off kezeńinen shet qalmaıdy. Erteń elordalyqtar Novokýzneskiniń «Metallýrg» ujymymen kúsh synassa, 18 aqpanda «Avangardty» qabyldaıdy. Aıta keteıik, qazirgi ýaqytta pleı-off kezeńine on komanda ótip tur. «Batys» konferensııasynda – SKA, SSKA, «Lokomotıv», Máskeýdiń «Dınamosy», «Torpedo» jáne Mınskiniń «Dınamosy», al «Shyǵysta» – magnıtogorlyq «Metallýrg», «Avangard», «Ak Bars», «Traktor» jáne «Barys».