Qyzylordalyqtar óziniń bolashaǵyna senimdi bola tústi – Kósherbaev

Bul týraly 15 aqpandaǵy turǵyndarmen esepti kezdesýinde  Qyzylorda oblysynyń ákimi Qyrymbek Kósherbaev habarlady. Kezdesý barysynda ol   jyl saıyn BAQ-ta jarııalanatyn oblystyń áleýmettik-ekonomıkalyq damýynyń basym baǵyttaryn beıneleıtin oblys ákiminiń is-qımyl josparynyń júzege asyrylý barysy týraly aıtty. «2016 jylǵa arnap qabyldanǵan oblys ákiminiń Is-qımyl jospary, budan  2 jyl buryn qabyldanǵan baǵdarlamalar sekildi. Negizinen, daǵdarysqa qarsy Is-qımyl jospary qyzmetin atqardy. Jyldyń negizgi basymdyqtary jumyspen qamtý men áleýmettik qorǵaý máseleleri, baǵany retsiz ósirmeý, ekonomıkany ártaraptandyrý men ınfraqurylymdy bıýdjettik múmkindikterdiń shekteýligine baılanysty memlekettik-jekelik seriktestik pen halyqaralyq qarjy uıymdary arqyly damytý máseleleri boldy», – dep atap ótti aımaq basshysy. 2016 jyldyń is-qımyl Josparyna 207 shara engizilgen bolatyn. «2015 jyldyń ózinde Qyzylorda oblysynda tabıǵı ósim 1000 adamǵa shaqqanda 20 promılle bolsa (1000 adamǵa shaqqanda 20 adam), 2016 jyly bul kórsetkish 21,2 promıllege  jetti. Demek, jurt óziniń bolashaǵyna senimdi bola bastaǵan. Týý kórsetkishi ósip, ólim kórsetkishi azaıdy», – dep málimdedi oblys ákimi.