Máseleni masa oıanbaı turǵanda sheshý kerek

Oblystyq energetıka jáne turǵyn úı-kommýnaldyq sharýashylyq basqarmasynyń málimetinshe, byltyr shybyn-shirkeıdi ýlaý úshin óńirdegi úsh qalaǵa 170 mıllıon teńge bólingen kórinedi. Dári-dármektiń bir lıtri byltyr 2232 teńgege jetken. Bıyl 600 mıllıon teńgedeı bólinipti. О́ıtkeni, EKSPO kórmesi ótetin 2017 jyldyń kóktem, jaz aılarynda óńirde shybyn-shirkeılerdi azaıtpaı bolmas. Oblystyq ákimdiktegiler «Bul kórme bizdiń óńir úshin de óte mańyzdy. Oblysqa týrısterdi tartý kerek jáne olardyń kelýlerine shirkeıler bóget bolmaýy kerek», dep otyr. Byltyr bálenbaı jyl tasy­maǵan Ertis ózeni arnasynan asty. Al shybyn-shirkeı degenińiz ózen tasýynan soń, tipti eki ese qaptady-aı deısiń. Bıolog Qanat Ahmetov – masa, shybyn-shirkeıdiń ósip-ónýi, tabıǵatqa, adamǵa tıgizer paıdasy men zııany jaıly zerttep júrgen ǵalym. Onyń aıtýynsha, bizge shybyn, shirkeı, masadan buryn oıanýy­myz kerek eken. Inelik uıasynan ushyp shyqqanǵa deıin shirkeıdiń tipten kóbeıýi beleń alady. Ob­lystyq energetıka jáne turǵyn úı-kommýnaldyq sharýashylyǵy basqarmasyndaǵylar bıyl shybyn-shirkeıdi ýlaý jumys­taryna 595 mıllıon teńge bólingenin aıtyp otyr. 516 mıllıon teńge bıologııalyq jáne hımııalyq dári-dármekterdi satyp alýǵa jumsalatyn bolsa, 69 mıllıon teńge dezınfeksııalaý qyzmetine jáne 10 mıllıon teńge ǵylymı turǵy­da qoldaý jumystaryna baǵyttalady eken. Bıyl bul baǵyttaǵy ju­mystar aldymen Ertis ózeniniń jaǵalaýyna, sonymen qatar, ózen boıynda ornalasqan Aqtoǵaı, Jelezın, Ertis, Qashyr, Lebıaji, Maı jáne Pavlodar aýdandarynyń aýmaǵynda júrgiziledi. Al byl­tyrǵy oblysqa jasalǵan masa, shybyn-shirkeılerdiń bet qaratpas «joryǵyn» estip, bizdiń bıologtarmen birlese zertteý jasap kórgen ombylyq ǵalymdar «Ertis ózeni jaǵasynda qorshaǵan orta buzyldy ma, talaı jyldardan beri qustar azaıdy, sur qazdar, qarlyǵashtar múlde kórinbeıdi. Al bul qustardyń azyǵy – shybyn-shirkeı men masa. Qalaı aıtsaq ta tabıǵattyń tepe-teńdigin saqtaýdy qatań nazarda ustaýymyz kerek», dep otyr. Farıda BYQAI, «Egemen Qazaqstan» Pavlodar