Menedjment zańsyzdyqty azaıtady

Ońtústik Qazaqstan oblystyq prokýratýrasynyń 2016 jyldyń qorytyndysy boıynsha ótkizgen alqa májilisinde jasalǵan baıandamaǵa qaraǵanda, ótken jyldyń ekinshi jarty jyldyǵynan bastap prokýrorlar kúndelikti jumyspen qatar, óz salasyna jobalyq menedjmentti engizýdi qolǵa alǵan. Al jobalyq menedjment degen ne? «Bir sózben aıtsaq, bul nátı­jege baǵyttalǵan komandalyq jumys jáne bizdiń óńirimizge tán ózekti máselelerdi sheshý maqsatyndaǵy ózara baılanysqan biregeı is-sharalar jıyntyǵy. Qyzmetkerlerdi bir mezette qaıta baǵdarlaý úshin naqty tapsyrma nemese nusqaý berý jetkiliksiz boldy. Tek úıretip oqytý men jobalyq tásildi engizýdiń ózine 3 aıdan astam merzim ketti. Osy saladaǵy jumys tıimdiliginiń tómendigine baılanysty orynba­sarlarymnyń arasyndaǵy qyz­mettik mindetter qaıta bólindi, onyń bireýi kúndelikti jumystan bosatylyp, jobalardy oryndaý mindeti júkteldi. Jumystyń jańa ádisterin engize otyryp, biz 12 jobany júzege asyrýǵa kiristik, olardyń árqaısysy bizdiń óńirge ózdiginshe óte mańyzdy», delindi oblys prokýrory Ibrahım Imanov jasaǵan baıandamada. Osyǵan oraı, bir-eki jobaǵa arnaıy toqtala keteıik. Halyq seniminen shyǵýdyń basty joly – azamattardyń ótinishterin sapaly qaraý men quqyqtaryn qorǵaý. Sol sebepti Ońtústiktiń prokýrorlary Bas prokýratýra sekildi «Tıimdi shaǵymdar qoǵamy» atty jobasyn iske asyrýǵa kirisken. О́ıtkeni, shaǵymdaný, aryzdaný – Ońtústik óńirinde óte ózekti másele. Sol shaǵymdardyń sany jylyna 10 paıyzǵa ósip otyrady, biraq, óki­nishke qaraı, olardyń 18 paıyz­y­na ǵana jaýap beriledi eken. Atalǵan joba aıasynda «Qo­ǵam­dyq qabyldaý» ınstıtýty qurylǵan. Jeke qabyldaýlar tek Konsýltatıvtik keńes múshe­leriniń qatysýymen ótkiziledi. Bul keńestiń quramyna oblystyń abyroıly azamattary men prokýratýra ardagerleri engen. Nátıjesinde osyndaı tájirıbeli azamattardyń qabyldaýynda bolyp, keńes alǵan azamattar qaıta shaǵymdanýdan bas tartyp, jeke qabyldaýǵa jazy­lýshylardyń sany 2 esege azaıǵan. Joba iske asyrylǵan 4 aıdyń ózinde prokýratýraǵa túsken ótinishterdiń sany 30 paıyzǵa tómendepti. Oblystyq prokýratýra qolǵa alǵan taǵy bir másele – jer telimi tóńi­regindegi zańsyzdyqtarǵa jol bermeýge qatysty. «Jer ýchaskelerine óz betinshe ıelik etýdi joıý» jobasy aıasynda jer ýchaskelerine óz betinshe ıelik etýdiń 452 faktisi anyqtalǵan. Qoldanylǵan sharalar negizinde keıbir jerlerdi qala ákimdigi zańdastyrdy, keıbirine ýaqytsha paıdalaný quqyǵy berildi. Qal­ǵandary óz betinshe jerdi bosatqan. Qolǵa alynǵan sharalar barysynda oblystyq kadastr or­talyǵynda jer ýchaskeleriniń ornalasýy men koordınattarynyń zańsyz ózgertilgeni, kadastrlyq isterge ońdy-soldy jalǵan máli­metterdiń engizilgeni anyqtalǵan. Baza kimniń bolsa, sonyń qolynda júrgen. Sodan prokýratýranyń júrgizgen jumystarynyń nátı­jesinde jerge ornalastyrý qyz­metimen aınalysatyn 79 jeke mekemelermen kelisimsharttar buzylsa, kadastr málimetterin zańsyz qoldanýdyń joly kesilip, bazany ashyq qoldanýǵa múmkindik joıylǵan. Bul osy saladaǵy alaıaq­tyq derekterin 7 esege tómen­detýge múmkindik bergen. Ǵalymjan ELShIBAI, «Egemen Qazaqstan» Ońtústik Qazaqstan oblysy