«Barselona» tizerlep, «Arsenal» tas-talqan bolǵan kún

Fýtbol jankúıerleri tún uıqysyn tórt bólip kóretin ÝEFA chempıondar lıgasy degen týrnır bar. Eki aılyq úzilisten keıin bul doda osy aptada qaıta jalǵasty. Chempıondar lıgasynyń 2016/17 jylǵy maýsy­mynyń toptyq kezeńi ótken jyldyń jeltoqsan aıynda aıaqtalǵan edi. Osy aptada pleı-off básekeleri bastaldy. Toptan sýyrylyp shyqqan 16 myqty ózara shırek fınaldyń joldamasyn sarapqa salady. • Keste boıynsha bul aptaǵa 4 oıyn josparlanǵan. Seısenbi kúni Fransııa men Ispanııa chempıondary kezdesti. Zlatan Ibragımovıch ketken soń, Parıj komandasy PSJ álsirep qalǵandaı kóringen edi. Alaıda, shved surmergeniniń ornyn joqtatpaıtyn fýtbolshylar az emes eken. «Park de Prens» stadıonynda alań ıeleri «Barselonany» qabyldap, 4:0 esebi­men jeńiske jetti. Esepti birinshi taımnyń ortasynda aıyp soqqysyn dál oryndaǵan Anhel Dı Marııa ashty. Úziliske deıin Marko Verrattıden pas alǵan nemis fýtbolshysy Iýlıan Draksler esepti eseleı tústi. Osy kúni óziniń 29-shy týǵan kúnin toılaǵan Dı Marııa ekinshi taımda dýbldiń avtory atandy. Matchtaǵy sońǵy goldy shabýylshy Edınson Kavanı óz atyna jazdy. Toptyq kezeńde 10 dop soqqan argentı­nalyq sýperjuldyz Lıonel Messıdi 21 jastaǵy fransýz qorǵaýshysy Presnel Kım­pembe «tusap» tastady. Sondaı-aq, surmer­gen Sýares pen drıblıngtiń sheberi Neımar da alańnan bastary salbyraǵan kúıde ketti. Qarymta oıyn 8 naýryzda «Kamp Noý» stadıonynda ótedi. • Portýgalııa astanasy Lıssabondaǵy «Benfıka» men «Borýssııa D» arasyndaǵy oıyn da alań ıeleriniń paıdasyna sheshildi. Matchtaǵy jalǵyz goldy grekııa­lyq shabýylshy Kostas Mıtroglý soqty. Nemisterdiń tarazy basyn teńestiretin múmkindigi bolǵan. Biraq, Per-Emerık Obameıang 11-metrlik penaltıden múlt ketti. Osy oıynda erekshe kózge túsken «Benfı­ka» qaqpashysy Edersonǵa qandaı maqtaý aıtsa da jara­sady. • Sársenbi kúni Madrıdtiń «Realy» óz alańynda Italııadan kelgen «Napolıdi» qabyldady. Chempıondar lıgasynyń qazirgi jeńimpazy birinshi bolyp gol jiberip alǵanymen, esin tez jıyp úlgerdi. Aldymen 19-mınýtta Benzema tarazy basyn teńestirse, úzilis­ten keıin Kross pen Kazemıro mergendik tanytty. Sóıtip, «Real» birinshi kezdesýdi eki dop aıyr­mashylyǵymen aıaqtady. Bul match­ta Kazemıro, Ronaldý, Benzema, Kross belsendi oınady. • PSJ sekildi «Bavarııa» da shırek fınalǵa bir taban jaqyndaı tústi. Bıylǵy jyly taǵy da «Arse­nalmen» joly túıisken «nemis mashınasy» qarsy­lasyn aıaǵan joq. Buǵan deıin Arsen Venger shákirtteri 1/8 fınalda alty márte «ushyp» ketken. Onyń ishinde 2012/13 jáne 2013/14 jyldardaǵy maýsymda dál osy «Bavarııaǵa» ese jiberip qoıǵan bolatyn. Oıynǵa qysqasha toqtalatyn bolsaq, birinshi taım teń aıaqtaldy. Robbenniń golyna Sanches úziliske deıin jaýap qaıtardy. Biraq, ekinshi taımda Germanııa chempıo­nyn toqtatý múmkin bolmady. Tıago Alkantara dýbl jasasa, Levandovskı men Mıýller bir-bir goldan soqty. Endi kelesi aptada taǵy 4 oıyn ótedi: «Manchester Sıtı» (Anglııa) – «Monako» (Fransııa); «Portý» (Portýgalııa) – «Iýventýs» (Italııa); «Baıer» (Germanııa) – «Atletıko» (Ispanııa); «Sevılıa» (Ispanııa) – «Lester» (Anglııa). Matchtar nátıjeleri: PSJ – «Barselona» – 4:0 Goldar: Dı Marııa, 18 (1:0). Draksler, 40 (2:0). Dı Marııa, 55 (3:0). Kavanı, 72 (4:0). «Benfıka» – «Borýssııa D» – 1:0 Gol: Mıtroglý, 48 (1:0). «Real» – «Napolı» – 3:1 Goldar: Insıne, 8 (0:1). Benzema, 19 (1:1). Kroos, 49 (2:1). Kazemıro, 54 (3:1). «Bavarııa» – «Arsenal» – 5:1 Goldar: Robben, 11 (1:0). Sanches, 30 (1:1). Le­vandovskı, 53 (2:1). Alkantara, 56, (3:1). Alkantara, 63, (4:1). Mıýller, 88 (5:1). Dıas ERKEBULAN, jýrnalıst ASTANA