Ulttyq mýzeıde «Mýzeı kitaphanasyna syı tartý» aksııasy ótti

Búgin QR Ulttyq mýzeıinde «Mýzeı kitaphanasyna syı tartý» aksııasy ótti. Aksııa barysynda Ulttyq mýzeıdiń Ǵylymı kitaphanasyna, turaqty qoldaný úshin, tarıh, arheologııa, etnografııa, mádenıettaný, restavrasııa, mýzeıtaný jáne basqa baǵyttar boıynsha kitaptar, maqalalar jınaǵy, konferensııa materıaldary, monografııalar tabys etildi. Sonymen qatar, aksııaǵa qatysyp, mýzeı kitaphanasyna syı tartý jasaǵan mekemeler men jeke azamattarǵa mýzeı dırektorynyń alǵys haty tapsyryldy. Saltanatty sharada sóz alǵan Ulttyq mýzeı dırektorynyń orynbasary Jáken Taımaǵambetov: «Búgingi aksııaǵa qatysyp qoldaý bildirgen azamattar men uıymdar az bolmady. Atap aıtqanda, QR Ulttyq kitaphanasy, «Folıant» baspasy, sonymen qatar, Qoıshyǵara Salǵarauly, Erlan Báttashuly, Qarjaýbaı Sartqojauly, Tursyn Jurtbaı, Darhan Qydyráli syndy birqatar zııaly qaýym ókilderi atsalysqan bolatyn» – deı kele, aksııaǵa qatysýshylarǵa alǵysyn bildirdi. Aksııanyń maqsaty – halyqtyń tarıhı-mádenı qundylyqtaryna, sonyń ishinde jazba jádigerlerdi saqtaýdyń ózekti máselelerine qoǵam nazaryn aýdarý, mýzeı kitaphanasynyń qoryn qundy qujattarmen jáne basylymdarmen tolyqtyrý. Aıta ketý kerek, «Mýzeı kitaphanasyna syı tartý» – «Ulttyq mýzeıge syı tartý» aksııasynyń bir tarmaǵy bolyp esepteledi. Byltyr osy aksııa barysynda kitaphana qoryna ártúrli uıymdar men jeke tulǵalalardan 1110 dana kitap syıǵa alynǵan bolatyn.