Borodıýk bizge ne beredi?

Fýtboldan Qazaqstan Ulttyq quramasynyń bas bapkeri aýysty. Talǵat Baısúfınovtiń ornyna reseılik maman Aleksandr Borodıýk taǵaıyndaldy. Federasııanyń baspasóz qyz­meti taratqan málimet boıynsha, Borodıýkti tańdaýdaǵy basty sebeptiń biri onyń bizdiń quramamen jumys isteýge degen yqylasy kórinedi. Ol birqatar ulttyq qurama men ózge elderdiń fýtbol uıymdarynyń usynystarynan bas tartypty-mys. Kelisimshart úsh jylǵa eseptelgen. Jańa bapkerge jergilikti jas daryn­dardyń talantyn ashý, qura­many jasar­tý mindetteri júk­teldi. Qazaqstan Fýt­­bol federasııasy bul tapsyrmany jú­ze­ge asy­rýǵa Alek­sandr Borodıýktiń mol tá­­ji­rıbesi jetetinine senimdi kórinedi. Al Talǵat Baısúfınov bolsa, federa­­sııanyń tehnıkalyq dırektory qyzmetin atqarady. Basshylyq osyndaı sheshim qabyldapty. Endi ol 17 jastaǵy jasóspirimder qurama­synan bastap, ulttyq quramaǵa deıin­gi komandalarmen jumys isteı­di. Sonymen qatar, onyń jańa qyzmetine fýtbol klýbtary men ortalyqtarda qurama komanda úshin fýtbolshylar daıarlaý mindeti kiredi. Sonymen, «Borodıýk degen kim, mamannyń qandaı jetistikteri bar?» degen suraqtarǵa jaýap izdep kóreıik. Fýtbolshy retinde dopty táýir tepken. Shabýylshy bolyp óner kórset­ken. Voronejde týǵan Borodıýk sport­tyq mansabyn jergilikti «Fakel» koman­dasynda bastaǵan. KSRO kezin­de karerasynyń basym bóligin Más­keýdiń «Dınamo» komandasynda ótkizgen. 1988 jyly jambyldyq Evge­­nıı Iаrovenkomen birge Seýl Olımpıa­dasyn­da chempıon atanǵan soń, Ger­manııaǵa aýysady. О́ıtkeni «Dınamoǵa» Anatolıı Byshoves bas bapker bolyp kelgen soń, negizgi quramǵa ilige almaıdy. Germanııada ekinshi býndes­lıga­daǵy «Shalke-04» komanda­synyń jeıdesin kıdi. Eki maýsymda 30 gol soǵyp, komandanyń sol kezdegi surmergeni boldy. 1993 jyly «Kicker» jýrnalynyń tujy­rymy boıynsha chempıonattyń úzdik úsh fýtbolshysynyń qata­ryna endi. Sonan soń, kelesi jyly «Fraı­býrgke» aýysyp, býnde­slı­ganyń qola júldesin jeńip aldy. Sol kezdegi Germanııa qura­masynyń bas bapkeri Bertı Fogtstiń: «О́kinishke qaraı, Borodıýk nemis emes. Áıtpese, oǵan Germanııa quramasynan oryn tabylatyny anyq», dep aıtqany bar. Bapkerlik karerasyn 2001 jyly «Krylıa Sovetov» komandasynan bas­tady. 2002 jyly ol Reseı quramasynyń bapkerler shtabyna endi. Al úsh jyldan keıin Reseıdiń jastar quramasynyń aǵa jattyqtyrýshysy atandy. Degen­men ulttyq quramadaǵy qyzmetin toqtat­pady. Gýs Hıd­dınk, Dık Advo­kat se­kildi tanymal gollandııalyq maman­dardyń kómekshisi boldy. Sol kezde bapker retinde biraz tájirıbe jınasa kerek. 2013 jyly Máskeýdiń «Tor­pedosyn» Reseıdiń premer-lıgasyna alyp shyqty. Al ótken jyly Almatynyń «Qaıra­tymen» úsh jyldyq kelisim­shartqa qol qoıdy. Naýryzda Qazaqstan Sýper­kýbogyn utyp aldy. Biraq chempıonatta qatarynan úsh týrda utylyp, óz erki­men qyzmetinen ketti. Alaıda, Boro­dıýk qyzmetten ketý sebebin tilshilerge ber­gen suh­batynda basqasha túsindirgen edi. «Start shynymen sátsiz bastaldy. Biraq meniń qyzmetimnen ketýimniń sebebi sporttyq turǵydan bolǵan joq. Al onyń naqty sebebin jarııaly túrde aıta almaımyn», dep edi A. Borodıýk. Sol kezde reseılik mamanǵa «Al­­ma­tydaǵy sátsizdik bolashaqta bapkerlik bedelińizge soqqy bolyp tımeı me?», degen saýal da qoıylǵan-tyn. «Múldem olaı emes. Maǵan Gaz­zaev, Iаrsev, Hıddınk, Advokat, Semın, Ignatev sekildi ózimen birge jumys istegen bapkerlerdiń pikiri ǵana mańyz­dy. Solardyń bergen baǵasy qundy. Al qalǵan eldiń ne aıtqanynda meniń sharýam joq», degen bolatyn ol. «Qaıratta» joly bolmaǵan bapker­diń quramaǵa kelýi jankúıer­lerdiń qy­tyǵyna tıip jatqany sózsiz. Jalpy, Reseıden kelgen maman­dardyń qazaq fýtbolynyń kósegesin kógertip jiber­geni shamaly. Polsha men Rýmynııamen óz alańynda teń túsýge shamasy jetken Baısúfınovti aıaq astynan alyp tas­taýǵa ne túrtki bolǵany taǵy túsi­niksiz. Bir kezderi bas jattyqtyrýshy bol­ǵan Leonıd Pahomovtan ázer qutyl­ǵan edik. Taǵy da solaı bolyp júrmese qaıtsin?! Álbette, áliptiń artyn baǵa­myz. Balapandy qońyr kúzde sanaı­tyny sekildi, Borodıýktiń de múmkindigin sol kezde baıqarmyz... Bek TО́LEÝOV, jýrnalıst ASTANA