Foto: Aqorda
Memleketter basshylary bir-birine delegasııa múshelerin tanystyrǵan soń Qurmet qaraýylynyń bastyǵy raport berip, eki eldiń ánurandary oryndaldy.
Aqordada Mońǵolııa Prezıdentin qarsy alý rásimi ótip jatyr
«Biz – tarıhy ortaq, tamyry bir baýyrlas eldermiz, kóshpendi halyqtardyń urpaǵymyz. Qazaq pen mońǵol – ǵasyrlar boıy irgesi bólinbegen kórshiler. Halyqtarymyzdyń ómir salty, ádet-ǵurpy óte uqsas. Qazir de osy máńgi qundylyqtardy arqaý etip kelemiz. Búginde yqpaldastyǵymyz strategııalyq seriktestik rýhynda damýda. Memleketaralyq, parlamentaralyq jáne úkimetaralyq baılanystarymyz nyǵaıýda. Qurmetti Prezıdent myrza, Siz ekijaqty qarym-qatynasymyzdy jańa deńgeıge kóterýge zor úles qosyp kelesiz. Muny joǵary baǵalaımyz. Qajyrly eńbegińizdiń arqasynda Mońǵolııada kóptegen oń ózgeris bolyp jatyr. Byltyr elińizdiń ekonomıkasy 6,8 paıyzǵa ósti. Bul Sizdiń salıqaly basshylyǵyńyzdyń jemisi ekeni sózsiz. Siz halqyńyzdyń ál-aýqatyn jaqsartý úshin mańyzdy bastamalardy júzege asyrdyńyz. Mońǵolııada memleketti damytýǵa arnalǵan «Vision-2050» keshendi jospary qolǵa alynǵanyn bilemiz. Sondaı-aq Qaraqorym atty jańa qala salýdy bastap kettińizder. Biregeı jobalardyń tabysty bolýyna tilektespiz. Sarabdal saıasatyńyzdyń arqasynda Mońǵolııanyń halyqaralyq bedeli arta tústi. Biz baýyrlas eldiń barlyq jetistigine qýanamyz», dedi Memleket basshysy.
О́z kezeginde Ýhnaagıın Hýrelsýh mońǵol-qazaq qarym-qatynasynyń mańyzyna toqtaldy.
«Araǵa jıyrma jyl salyp Qazaqstanǵa memlekettik saparmen kelgenime qýanyshtymyn. Sizdiń osydan eki jyl buryn bizdiń elimizge jasaǵan memlekettik saparyńyz mońǵol-qazaq qarym-qatynastaryn strategııalyq seriktestiktiń jańa deńgeıine kóterdi. Bul ýaqıǵa ekijaqty baılanystar tarıhyna altyn árippen jazylatyny sózsiz. Qurmetti Prezıdent myrza, Sizdiń kóregen, parasatty jáne joǵary kásibı basshylyǵyńyzdyń arqasynda Qazaqstan ekonomıkalyq jáne áleýmettik salalardy damytýda aıtarlyqtaı tabysqa jetti. Mońǵol halqy elińizdiń jetistikterin jiti baqylap otyr. 2024 jylǵy Mońǵolııaǵa saparyńyz barysynda onnan astam qujatqa qol qoıyldy. Búgin de birqatar mańyzdy qujattar qabyldanady», dedi Mońǵolııa Prezıdenti.
