Semeıdi damytýdyń úsh jyldyq baǵdarlamasy qabyldandy

Semeıde oblys ákimi Danıal Ahmetovtiń bastamasymen oblystyq ákimdiktiń kóshpeli otyrysy ótti. Jıynǵa qalanyń zııaly qaýymy, aýdan, qala ákimderi, qoǵamdyq uıymdar men túrli sala mekemeleriniń ókilderi, kásipkerler qatysty. Qala ákimi Ermak Sálimovtiń aıtýynsha,búgingi tańda Semeıdi damytýdyń 2017-2019 jyldarǵa arnalǵan aýqymdy jobasy 4 salany qamtyp otyr. Bul turǵyn úı qurylysyn jańǵyrtý, áleýmettik sala, ınfraqurylym, kommýnaldyq sharýashylyqty retteý máseleleri. Soǵan oraı barlyq deńgeıli bıýdjetten 113 mlrd teńge qarastyrylǵan. Jyl saıyn Semeıdiń joldaryn jóndeýge 1 mlrd teńge qarajat bólinetin boldy. Kóshpeli otyrysta jańadan salynatyn «Abaı Arena» kesheniniń úlgisin slaıd arqyly kórsetip tanystyrǵan oblys ákimi Danıal Ahmetov bylaı dedi: – Elbasy Nursultan Nazarbaevtyń bıylǵy Joldaýy halyqtyń ekono­mıkalyq ál-aýqatyn arttyrýmen qatar, jańadan damý, jańǵyrtý jol­daryna da arnalyp otyr. «Abaı Arena» kesheni Semeıdiń mádenı-sporttyq, saýyqtyrý baǵytyndaǵy tynys-tirshiligine erekshe lep bermek. Bul halyqaralyq talapqa saı nysan ári 5 myń kórermenge arnalǵan orny bar. Bizde osy keshenniń tehnıkalyq-ekonomıkalyq jobasy daıyn. Qurylysy Qaraǵaıly shaǵyn aýdanynda júredi. Osy keshen arqyly Semeı elimizdiń ózge qalalarynan erekshe bolyp kórinetin bolmaq. Bul Semeı qalasynyń 300 jyldyǵyna arnalyp otyr. Aýmaǵy 14 myń sharshy metrdi quraıdy. Semeı ekonomıkasynyń mańyzdy salasy agroónerkásip bolyp tabyl­ǵandyqtan, aýylsharýashylyq ónim­derin óndirý 2016 jyly 2015 jylmen salystyrǵanda 1 mlrd teńgege artqan. Salada mal ósirip, et óndirýde asyl tuqymdy maldardy ósirýge asa zor mán berilýde. «Kópejan» sharýa qojalyǵynda taýarly-sút fermasy qoldanysqa berilse, «Nur» sharýashylyǵynda ferma qurylysy aıaqtalyp qaldy. Qala turǵyndary senbi saıyn turaqty ótkiziletin aýylsharýashylyq jármeńkelerinen, qunarly ári ekologııalyq taza dep sanalatyn jergilikti ónimderdi qoljetimdi baǵada satyp alyp otyr. Raýshan NUǴMANBEKOVA SEMEI