«Qaırat» – Sýperkýbok ıegeri

Almatynyń «Qaırat» fýtbol klýby Qazaqstan Sýperkýbogy synynda «Astana» komandasyn 2:0 esebimen utyp, bıylǵy maýsymdaǵy alǵashqy júldesine ıe boldy. Kezdesýdiń alǵashqy mınýttarynan-aq almatylyq­tardyń basymdyǵy baıqalyp turdy. Andreı Ar­shavın bastap, Isael qostaǵan shabýyl shebindegi fýtbolshylar Erıch qorǵaǵan qaqpaǵa dúrkin-dúrkin qaýip tóndirip otyrdy. «Astana» kóbine qarymta shabýylǵa ıek artyp, qorǵanysqa mán berip, asa saqtyqpen oınady. Tvýması, Kabananga syndy shabýyl­shylardyń aragidik qaqpaǵa umtylǵan áreketteri «Qaırattyń» tas qamal qorǵanysynan asa almaı jatty. Keıbir sátterde qaqpashy Plotnıkov ta senimdi oınady. Jalpy, oıynnyń jankúıerdi jalyqtyrmaıtyndaı qyzyqty ótkenin aıtý kerek. Maýsymnyń jańa bastalyp jatqanyna qaramastan, eki komanda da joǵary jyl­damdyqqa arqa súıegen kesteli oıyn órnegin kórsetti. Jankúıer qaýym bıylǵy oıyn da teń aıaqtalyp, match sońy penaltıge ulasa ma dep otyrǵanda, kezdesýdiń 77-mınýtynda esep te ashyldy. Baýyrjan Islamhannyń aıyp alańyna áýelete bergen dobyn qorǵaýshy Sezara Arzo golǵa aınaldyra bildirdi. Qalt-qult etken osy esep matchtyń sońyna deıin saqtaldy. Al tóreshi qosqan qosymsha ýaqytta Islambek Qýat sheberlik tanytyp, esepti eseledi. Sóıtip, 2:0 esebimen jeńiske jetken «Qaırat» osymen ekinshi jyl qatarynan Qazaqstan Sýperkýbogynyń ıegeri atandy. Almaty. «Astana» – «Kaırat» 0:2 (0:0); Goldar: Arzo 77 (0:1), Kýat 90+3 (0:2); Eskertý: Maevskıı 57, Shomko 78, Logvınenko 84, Qýat 28, Arshavın 80, Markovıch 90+2; Alańnan qýylý: Qýat 90+3; «Astana»: Erıch, Anıchıch, Shomko, Beısebekov, Logvınenko, Postnıkov (Shıtov 83), Mýjıkov, Maevskıı, Tvýması (Murtazaev 81), Kabananga, Lýllaký (Jalmuqan 72); «Qaırat»: Plotnıkov, Ahmetov, Súıimbaev, Markovıch, Arzo, Bakaev, Qýat, Islamhan (Rýdosel­skıı 90+2), Arshavın (Ilıchevıch 72), Isael (Jýkov 89), Goý. Qaırat ÁBILDINOV, «Egemen Qazaqstan» ASTANA