QR BǴM áleýmettik jelidegi jalǵan aqparatqa qatysty málimdeme jasady

Ortalyq kommýnıkasııalar qyzmetinde Bilim jáne ǵylym mınıstrligi ókilderiniń qatysýymen brıfıng ótti. Oǵan vıse-mınıstr Elmıra Suhanberdıeva, Joǵary jáne joǵary oqý ornynan keıingi bilim departamentiniń dırektory Darhan Ahmed-Záki, mınıstrliktiń Mektepke deıingi jáne orta bilim departamentiniń dırektory Janyl Jontaeva men Zań qyzmeti jáne halyqaralyq yntymaqtastyq departamentiniń dırektory Nurseıit Baıjanov qatysty. Brıfıngte vıse-mınıstr Elmıra Suhanberdıeva áleýmettik jelilerde vedomstvonyń qyzmetine qatysty tarap jatqan aqparat týraly málimdeme jasady. Ol aldymen osydan bir aı buryn elimizge belgili bir top ǵalymdardyń joǵary oqý oryndarynda qazaq tili men ádebıeti jáne basqa da pánderdiń alynyp tastalýyna baılanysty mınıstrdiń atyna jazǵan hatyna baılanysty túsinikteme berdi. Onda vıse-mınıstr hattyń qalaı paıda bolǵany belgisiz ekenin, atalǵan pánderdiń bilim ordalarynda oqytylyp jatqanyn, olardyń aldaǵy ýaqytta da saqtalatynyn atap ótti. ­-«Qazaq tili men ádebıeti», «Tarıh», «Lıngvıstıka» men «Shyǵystaný» óz ornynda. Eshteńe ózgergen joq, ózgermeıdi de. Bolashaqta pánderdiń bári saqtalady. Olardy ýnıversıtette jabý týraly aqparat jalǵan. Elimizde qazaq tili men ádebıetiniń qafedralary qalypty jaǵdaıda jumys istep jatyr. Sondyqtan osy kafedralardyń jabylýy týraly málimdemeler josparlanǵan jalǵan aqparatty taratý, - dedi ol. Odan keıin ol álippe oqýlyǵyn almastyrý men «Serpin» baǵdarlamasyna qatysty alyp-qashpa áńgimeniń shyndyqqa janaspaıtynyn aıtty.  Onyń aıtýynsha, byltyr pedagogtarmen kelise otyryp álippeni 0-shi synypta oqytylatyny týraly sheshim qabyldanǵan. Qazirgi ýaqytta mektepke baratyn balalar árip tanyp, oqı alady.  Sondyqtan «Álippe» mektepaldy daıarlyq deńgeıinde oqytylý tıis, ıaǵnı, balalardy mektepke daıarlaıtyn 0-shi synyptarǵa beriledi.  Al «Ana tili» páni 1-shi synyptan bastap oqytylady. Jıynda mınıstrlik ókilderi áleýmettik jelide kópten beri qyzý áńgime bolyp jatqan «Serpin» baǵdarlamasyna qatysty da túsinikteme berdi. Mektepke deıingi jáne orta bilim departamentiniń dırektory Janyl Jontaeva «Serpin» baǵdarlamasynyń josparly túrde júrgizilip jatqanyn, bıyl oǵan qosymsha 500 oryn bólingenin aıtyp, qazir jobaǵa 9 myńnan astam adam qatysyp otyrǵanyn aıtty. ­-Bıyl bólingen qosymsha 500 oryn magıstranttar men doktoranttarǵa baǵyttaldy. Bul másele pedagog qaýymymen jáne jergilikti atqarýshy organdarmen keńinen talqylandy, ­ - dedi ol. Dastan Kenjalın, "Egemen Qazaqstan".