Búgin Almatyda QMDB-nyń tóraǵasy, Bas múftı Erjan qajy Malǵajyuly Dinı basqarma bólim basshylary men din qyzmetkerleriniń qatysýymen jınalys ótkizdi, dep jazady muslim.kz.
Bólim basshylarymen bolǵan jıynda «Zeket» qorynyń dırektory Álisher Spanov, Ǵalamtormen jumys bóliminiń basshysy Murat Ábdihalyqov Sharıǵat jáne pátýa bólimi mamany Baýyrjan Ábdýáli men Medet Qurmashuly, «Iman» jýrnalynyń Bas redaktory Ońǵar О́mirbek Bas múftıge dinı baǵytta aqtarylyp jatqan jumystar týraly baıandady. Bas múftı Erjan qajy Malǵajyuly bólim basshylarynyń sózinen keıin jınalǵandardyń nazaryn dinniń ár salasyndaǵy máselelerdi jiti qadaǵalap, damytý týraly naqty mindettemeler júktedi. Sondaq-aq, Ǵalamtormen jumys bólimine Qazaqstannyń ár óńirinde namaz ýaqytyn naqty, dál esepteıtin mobıldi qosymsha ázirleýdi tapsyrdy.
«Dinı basqarma qoǵamnyń dinı turǵydan bir tutas damýyna, bir yńǵaı órken jaıýyna, ár saǵat, ár kún saıyn gúldenýine múddeli jáne osy baǵytta talmaı jumys jasap kele jatyr. Sondyqtan, jumysymyzdy kún saıyn jetildirip otyrý – barshamyzǵa ortaq másele. Dinı basqarmanyń jumys jasaý tórt baǵyty, Din men dástúr jáne tarıh taǵlymy bastamasy din qyzmetkerleriniń aldyna qoıatyn maqsaty men mindetterin aıqyndap berdi. Dinı baǵyttaǵy jumys - kez kelgen tustan jol salyp júre berýge bolatyn ashyq alań emes. Ǵasyrlar boıy qazaq dalasynda din ustanýdyń joly, mektebi qalyptasty. Mine, biz eń aldymen sol júrer jolymyzdy júıelep, baǵyt-baǵdarymyzdy aıqyndap alýymyz kerek boldy. Endi osy baǵyttardy basshylyqqa ala otyryp talmaı dinge qyzmet etýimiz kerek», – dedi Bas múftı Erjan qajy Malǵajyuly.
Dinı basqarmanyń bólimderi dinniń ár salasy boıynsha bul kúnde jemisti eńbek etip, egemendi elimizdiń erteńi úshin aıtarlyqtaı oń yqpalyn tıgizip keledi. Qoǵamda ıgi is sharalar uıymdastyryp, ımandylyqty nasıhattap keledi. Imamdardyń bilimi men biliktiligi de artty. Dinı dárister men ýaǵyz-nasıhat jumystarynyń sany men sapasynyń kóterilýi – osynyń aıqyn dáleli.
QMDB-nyń tóraǵasy, Bas múftı Erjan qajy Malǵajyuly atalmysh jıyndy qorytyndylaı kele barlyq din qyzmetkerleriniń jumysyna sáttilik tiledi.
