Aqyshev depozıttik salymdardaǵy dollardyń úlesin azaıtpaq

Qazaqstanda dollarsyzdandyrý prosesi qarqyndy júrýde. Aldaǵy ýaqytta dollardy yǵystyrý sharalary taǵy kúsheıtilmek. Bul týraly The Business Year basylymyna bergen suhbatynda QR Ulttyq bankiniń tóraǵasy Danııar Aqyshev málimdedi. "Meniń mindetim - dollarmen salynǵan depozıtterdiń kólemin tarıǵı 40 paıyzǵa deıingi qalpyna keltirý", - dedi bas bankır. Onyń aıtýynsha, Qazaqstan bul turǵyda aıtarlyqtaı jetistikterge jetti. "Biz birneshe memlekettiń tájirıbesin zertteı kele mynany túsindik: dollardy yǵystyrý úshin birneshe jyl qajet bolǵan. Máselen, Túrkııadaǵy dollarlyq depozıttik 10 paıyz ózgerýi tek sońǵy 5 jylda baıqalǵan", - dedi Aqyshev. Máselen, Aqyshevtyń aıtýynsha, 2016 jyly jeke tulǵalardyń dollardaǵy depozıtteri kólemi 70 paıyzdan 55 paıyzǵa deıin túsken. Bul naqty valıýtamen eseptegende 1,1 trln teńge. Al osy ýaqytta teńgedegi depozıt kólemi 3,3 trln teńgege artty. Aqyshevtyń aıtýynsha, aldaǵy jyldary Qazaqstan ekonomıkasynda oń ósim bolady. Biraq qarqyn anaý aıtqandaı joǵary bola almaıdy. "2017 jyly ekonomıka ósimi 1,5-2 paıyz aralyǵynda bolady. Bul munaıdyń baǵasyn 40 dollarmen eseptegendegi boljam. Naryqtaǵy jańa jaǵdaıǵa yńǵaılaný kezeńi 2018 jyldyń sońyna deıin jalǵaspaq. 2018 jyldyń 1 maýsymyna deıin el ekonomıkasy óz áleýetinen tómen kórsetkishten kórsetedi. Bul ishki naryqtaǵy deflıasııalyq qysymnyń áseri bolmaq. Al syrtqy áserge keler bolsaq, Eýropa men Reseı ekonomıkasynyń qarqyn alýy bizge de oń áser etedi", - dedi bas bank basshysy. Onyń pikirinshe, Qazaqstan ekonomıkasyna munaı sektorynan bólek basqa da qoldaýshy salalar bar. Atap aıtar bolsaq, olar aýyl sharýashylyǵy men agroónerkásiptik keshen, tigin isi, tamaq ónerkásibi. Sonymen qatar geografııalyq ornalasý jaǵynan da Qazaqstan ekonomıkasy úshin aıtarlyqtaı artyqshylyqtar bar.