Dımash oryndaǵan «Daıdıdaý» Azııa ánderiniń reıtıngine endi

Qazaqstandyq jas ánshi Dımash Qudaıbergen ótken aptada Qytaıdaǵy «I’m a Singer» án baıqaýynyń jetinshi kezeńinde óner kórsetip, Aspanasty eline qazaqtyń ánin tanytqan edi. Bul kúnde Dımash shyrqaǵan «Daıdıdaý» áni «Azııanyń jańa ánderi» (Freshasia music) reıtınginde 107 341 upaımen 15-orynnan kórindi. Al onyń buǵan deıingi shyrqaǵan «Adagio» men «SOS d'un terrien en détresse» ánderi sáıkesinshe 41 jáne 50-oryndardy ıelendi, dep habarlady QazAqparat. Qazaqtyń «Daıdıdaý» áni qytaı tilinde de shyrqalǵan. Shyńjańdyq ánshi Gao Iin 2012 jyly atalmysh án qamtylǵan halyq ánderi albomyn shyǵaryp, Italııanyń «Premio Lunezia» syılyǵyn jeńip alǵan bolatyn. Aıta keteıik, Dımash Qudaıbergen 2015 jyly «Slavıan bazary» halyqaralyq án baıqaýynda osy «Daıdıdaý» ánimen bas júldege ıe bolǵan. «Azııanyń jańa ánderi» reıtıngi azııalyq ánshilerdiń Qytaıdaǵy tanymaldylyǵyna baılanysty jasalady. Onda ánderdiń tyńdalymy, aqyly túrde júktep alynýy boıynsha upaılar berilip, reıtıng qurylady. Ol ár 10 mınýt saıyn jańartylyp, jyl sońynda úzdik reıtıng jarııalanady.