Astanada Sırııa máselesi boıynsha 3-shi kelissóz ótedi

Sırııa boıynsha Astana prosesiniń sheńberindegi joǵary deńgeıdegi kezekti halyqaralyq kezdesý 2017 jylǵy 14-15 naýryzda Qazaqstannyń astanasynda ótedi, dep habarlaıdy QR Syrtqy ister mınıstrliginiń baspasóz qyzmeti. Kelissózderge Reseı, Túrkııa jáne Irannyń joǵary laýazymdy delegasııalary qatysady. BUU, AQSh jáne Iordanııa ókilderine shaqyrýlar joldanýda. Kepildik berýshi memleketter tarapynan Sırııa úkimeti jáne qarýly oppozısııasy delegasııalarynyń kezdesýge qatysýlary boıynsha rastaýlary kútilýde. 14 naýryzǵa aldyn ala konsýltasııalar josparlanǵan, al 15 naýryzǵa jalpy otyrys belgilengen. Qazaqstan Respýblıkasynyń Prezıdenti Nursultan Nazarbaevtyń tolyq qoldaýymen jáne tikeleı atsalysýymen bastalǵan Astana prosesiniń aıasynda 2017 jylǵy 23-24 qańtarda jáne 15-16 aqpanda Astanada Sırııa boıynsha joǵary deńgeıdegi halyqaralyq kezdesýdiń eki raýndy, sondaı-aq 6 aqpanda sarapshylardyń tehnıkalyq kezdesýi ótti. Bul kezdesýlerdiń negizgi nátıjesi BUU Qaýipsizdik Keńesiniń 2254 (2015) qararyna sáıkes taraptarǵa Jeneva prosesiniń aıasynda kún tártibiniń saıası máselelerin talqylaýǵa kóshý múmkindigin bergen Sırııadaǵy soǵys amaldaryn toqtatý rejımin baqylaý boıynsha birlesken jedel top týraly erejeni kelisý bolyp tabyldy. Qazaqstan Sırııadaǵy jaǵdaıdy retteý boıynsha halyqaralyq kúsh-jigerlerge óziniń barlyq úlesin qosýdy jáne Sırııanyń ishki qaqtyǵysyn saıası túrde sheshý joldaryn izdeýdi ári qaraı jalǵastyrýǵa daıyn.