Qazaqstan saıahattaýǵa usynylǵan TOP-17 eldiń qataryna endi

Amerıkanyń The Huffington Post  tanymal basylymy  saıahatshylarǵa Qazaqstanǵa barýdy usyndy, dep habarlady QazAqparat.  Basylym 2017 jyly saıahattaý úshin 17 oryndy usynyp otyr jáne tek týrıst bolyp qoımaı, zertteýshige aınalýǵa keńes berdi. Qazaqstan reıtıngtiń úshinshi ornynda ornalasqan. Saıahattaýshylarǵa Qazaqstandy tanýdy Almatydan, Astana men Aqtaýdan bastaýǵa keńes berilýde. «Álemde kólemi jóninen 9-orynda. Arhıtektýra men qala boıynsha ekskýrsııany unatatyndar jerdiń az zerttelgen bul buryshynda ózderin úıdegideı sezinetin bolady. Eldiń úlken qalasy - Almatydan bastańyz, munda jaqsy kıim-keshek bazarlary, joǵary dárejeli meırahanalar bar», - dep atap ótken basylym. Sonymen qatar týrısterge taýǵa, ormanǵa, Úlken Almaty kóline barýǵa keńes berilgen. Basylymnyń aıtýynsha, 20 jyl buryn ǵana jer betinde bolmaǵany úshin «álemniń aqylǵa qonbaıtyn astanasy» atalyp ketken Astana qalasy óziniń fýtýrıstik sáýletimen tartatyn bolady. Al Kaspıı teńizine shomylyp qaıtý úshin basylym munaı ónerkásibiniń ortalyǵy - Aqtaý qalasyna barýdy usyndy. The Huffington Post-tiń reıtıngine sondaı-aq, Ońtústik Koreıa, Mavrıkıı, Kıpr, Latvııa, Ekvador, Samoa, Ýrýgvaı, Namıbııa, Gvatemala, Papýa-Jańa Gvıneıa, Nıýfaýndlend, Rýmynııa, Laos, Ázerbaıjan, Slovenııa jáne Seıshel endi.