Baýkeńniń maýzeri

Dańqty batyr, jazýshy Baýyrjan Momyshuly óziniń fotosýretterin, kúndelikti ómirde paıdalanǵan ydystaryn, kitaptaryn, maýzerin, sonymen qosa temeki tartatyn múshtegin, kartasyn jáne qoıyn dápterin 1965 jyly Iаltada jazǵan ósıet hatynda Jambyl oblystyq mýzeıine qaldyrǵanyn aıtqan. Búgingi tańda atalǵan tarıhı-ólketaný mýzeıiniń «Jambyldyqtar – Uly Otan soǵys jyldarynda» atty zalynda Baýyrjan Momyshulynyń jeke zattary ekspozısııada oryn alǵan. Tek ótken jyly batyrdyń soǵysta paıdalanǵan kartasy men qoıyn dápteri Astana qalasyndaǵy «Áskerı mýzeıge» berilgen eken. Mýzeıde oq pen ottyń kýásindeı bolyp turǵan maýzer batyrdyń kózi ǵana emes, aıbar-sesi, rýhy bolyp asqaqtaıdy. «Kúndeı kúrkirep ótken» soǵystyń qaıǵysy men qasiretin maýzer de boıyna búgip, bolmysyna jasyryp turǵandaı. Jádigerdiń tusynda «Maýzer polkovnıka Baýyrjana Momyshýly» degen jazý bar. Bar ómirin áskerı qyzmetke arnap, Uly Otan soǵysyna qatysqan dańqty qolbasshy bul maýzerdi sol otty jyldary paıdalanyp, keıinnen kóziniń tirisinde Áýlıeata mýzeıine tapsyrǵan. Mýzeıdiń ǵylymı ekspozısııalyq jumys jáne qordy esepke alý bóliminiń meńgerýshisi Móldir Qyzdarbekovanyń aıtýynsha, Baýyrjan Momyshuly Áýlıeata jerine bir kelgeninde óziniń qylyshy men dombyrasyn da jergilikti mýzeıge syılaıtyn oıy bar ekenin aıtqan eken. О́kinishke qaraı, áldebir kisiden berip jibergen qundy jádigerler sol kúıi munda jetpegen. Eger qundy qazyna Jambyl jerine jetip, mýzeı tórinen oryn alǵanda jurtshylyq búginde taǵy bir taǵdyrly jádigerdiń kýágeri bolatyn edi. Jambyl oblystyq tarıhı-ólketaný mýzeıi 1931 jyly 25 tamyzda Áýlıeata ólketaný mýzeıin ashý týraly qabyldanǵan sheshim negizinde qurylǵan. Búginde 85 jyldyq tarıhy bar mýzeıge kelýshilerdiń qatary qalyń. Ásirese, Baýyrjan Momyshulynyń tutynǵan buıymdary jáne ózge de zattary jastardy patrıottyq rýhta tárbıelep keledi. Hamıt ESAMAN, «Egemen Qazaqstan» Jambyl oblysy