Parlamenttiń jaýapkershiligi artady

6 naýryz kúni Parlamenttiń qos palatasy «Qazaqstan Respýblıkasynyń Konstıtýsııasyna ózgerister men tolyqtyrýlar engizý týraly» zań jobasyn qabyldaǵan bolatyn. Endi Memleket basshysy atalǵan zańǵa qol qoıdy. Ortalyq kommýnıkasııalar qyzmetinde ótken baspasóz máslıhatynda Parlament Senatynyń depýtaty, Agrarlyq máseleler, ta­bıǵatty paıdalaný jáne aýyldyq aý­maqtardy damytý komıtetiniń múshesi Mu­rat Baqtııaruly Konstıtýsııaǵa engizilgen ózgerister men tolyqtyrýlardyń mańyzy men maqsattary jóninde áńgimeledi. Onyń aıtýynsha, jalpy, Konstıtýsııaǵa engizilgen ózgerister men tolyqtyrýlardyń mańyzy óte joǵary, sebebi, Memleket basshysynyń óz ókilettikterin basqa bılik tarmaqtary arasynda bólýiniń ózi – sırek kezdesetin qubylys. Senat depýtaty zań jobasyna sáıkes, Parlamentke júktelgen jańa mindetter týraly aıtyp ótti. «Buǵan deıin Parlament Qazaqstan Respýblıkasynyń zań shyǵarý qyzmetin atqaratyn eń joǵary ókildi organ bolsa, endi ol zań shyǵarý bıligin jú­zege asyrady, – dedi M.Baqtııaruly. – Son­daı-aq, Konstıtýsııanyń 57-babynyń 6-tar­maqshasyna engizilgen tolyqtyrýǵa baılanysty Parlament depýtattarynyń jalpy sanynyń kem degende úshten biriniń bas­tamasy boıynsha Úkimet músheleriniń óz qyz­metteri jaıly esebin tyńdaýǵa quqyly. Esepti tyńdaý barysynda depýttardyń úshten ekisiniń, ıaǵnı kópshiliginiń basym daýysymen respýblıkanyń zańdylyqtary oryndalmaǵan jaǵdaıda Úkimet múshelerin oryndarynan bosatýdy Qazaqstan Respýblıkasynyń Prezıdentinen suraı alady. Mundaı jaǵdaıda Prezıdent Úkimet múshelerin ornynan bosatady degen ózgerister engizildi». Depýtattyń aıtýynsha, konstıtýsııalyq ózgeristerge sáıkes, endi Úkimet óz qyzmeti úshin tek Prezıdenttiń aldynda emes, sonymen qatar, Parlament Májilisiniń aldynda da jaýapty bolady. «Bul Parlamenttiń quzyreti men jaýapkershiligin arttyrýmen qatar, partııalyq júıeniń damýyna keń jol ashady», dedi ol. Aıdar О́RISBAEV, «Egemen Qazaqstan»