Qazaqstannyń bastamalary BUU ustanymyna saı keledi

Astanada Qazaqstan Syrtqy ister mınıstri Qaırat Ábdirahmanov BUU Bas hatshysynyń saıası máseleler jónindegi kómekshisi Mıroslav Ienchpen kezdesti. Bul týraly Syrtqy ister mınıstrliginiń baspasóz qyzmeti habarlady. Kezdesý barysynda elimizdiń syrtqy saıasat vedomstvosynyń basshysy BUU-nyń joǵary laýazymdy ókiline elimizde qolǵa alynǵan konstıtýsııalyq reformalar men Memleket basshysy Nursultan Nazarbaevtyń Qazaqstan hal­qyna arnaǵan bıylǵy Joldaýynda qam­tyl­ǵan basym baǵyttar jóninde áńgimelep berdi. Mınıstrdiń aıtýynsha, elimizde júzege asyrylyp jatqan konstıtýsııalyq reformalar BUU-nyń ornyqty damý maqsattarymen sáıkes keledi. Bul reformalar el táýelsizdigin nyǵaıta túsýge, memlekettik ınstıtýttardyń tıimdiligin arttyrýǵa, saıası turaqtylyq pen ekonomıkalyq ornyqty damýdy qamtamasyz etýge tikeleı áser etedi. Mıroslav Iench óz kezeginde Qazaqstan Konstıtýsııasyna engizilgen ózgerister eldiń saıasat jáne ekonomıka salasynda úlken tabystarǵa qol jetkizýine tikeleı áser etetinin aıtty. Sondaı-aq, ol aımaqtyq jáne halyqaralyq ózekti máselelerdi sheshý isinde elimizdiń rólin joǵary baǵalaı kelip, Sırııa jónindegi kelissózderdi ilgeriletýde Astana prosesiniń mańyzdylyǵyna toqtaldy. Onyń aıtýynsha, Qazaqstannyń bul is-qımyldary BUU Bas hatshysynyń álemdegi túrli daý-janjaldardy retteýde beıbit kelisimderge basymdyq berý jónindegi ıdeıasymen astasyp jatyr. Kezdesýde Qazaqstan jaǵy Ortalyq Azııadaǵy ekijaqty jáne kópjaqty yntymaqtastyqtyń óz deńgeıinde damyp otyrǵanyn, aımaq elderi kóptegen ózekti máselelerdi ózara kelisimmen sheshýge múddelilik tanytyp kele jatqanynyń nátıjesinde eńserilýi qıyn túıtkilder joq ekenin atap kórsetti. Qazaqstannyń bas dıplomaty, sondaı-aq, elimiz BUU Qaýipsizdik Keńesiniń múshesi retindegi qyzmetinde Ortalyq Azııa memleketteriniń ózara yntymaqtastyǵynyń áleýetin ornymen paıdalanatynyn atady. Bul jerdegi másele Aýǵanstanǵa jáne ózge de aımaqtarǵa BUU Qaýipsizdik Keńesi músheleri delegasııasynyń saparyn, sondaı-aq, óńirdegi qaýipsizdikti qamtamasyz etý baǵytynda múddeli elderdiń qatysýymen aımaqtyq konferensııalar uıymdastyrý jóninde bolyp otyr. Budan bólek, taraptar Ortalyq Azııa men Aýǵanstannyń qaýipsizdigin qamtamasyz etýdiń mańyzdylyǵyn aıta kelip, álemdik jáne aımaqtyq beıbitshilikti nyǵaıtý baǵytynda joǵary deńgeıli pikirtalastar uıymdastyrýǵa, sondaı-aq, negizgi mindetterdi júzege asyrý barysynda birlese jumys isteýge yntaly ekenderin bildirdi. Kezdesýde Q.Ábdirahmanov BUU-nyń terrorızmge qarsy kúreske qatysty reformasyna, BUU Bas hatshysy orynbasarynyń basqarýyndaǵy Terrorızmge qarsy kúres ofısiniń qurylǵanyna qoldaý bildirdi. Qoryta aıtqanda, kezdesý ádettegideı dostyq ráýishte ótti jáne ol Qazaqstan men BUU-nyń ekijaqty yntymaqtastyǵynyń joǵary deńgeıin kórsetip berdi.