Serik Eleýov: Jastardy synǵa aıamaı salý kerek

Qazaq boksynyń tarıhynda aıshyqty iz qaldyrǵan bylǵary qolǵap sheberleriniń biri, Afıny-2004 Olımpıadasynyń qola júldegeri Serik Eleýov Ulttyq qurama komandada bo- lyp jatqan ózgeristerdi jiti qadaǵalap otyrady. Bul kúnde boks mektebiniń basshysy bolyp qyzmet etetin mamannyń pikiri bokssúıer qaýym úshin qyzyqty bolady degen oıdamyz. «Qalaı bolǵan kúnde de, ózgerister jaqsylyqqa bastaıdy dep senemin, – deıdi Serik Eleýov. – Qazirgi quramada tolysqan tájirıbe men jalyndaǵan jastyq úılesim tapqan. Meniń oıymsha, quramadaǵy kóshbasshy boksshylar ketkenimen, olardyń ornyn laıyqtylar basqandaı. Alda ýaqyt bar – olımpııalyq sıkl endi bastaldy. Bizdiń boksshylar áli-aq ózderin kórsetedi dep senemin». – Quramadaǵy 81 kılo salmaq dárejesinde qyzyq jaǵdaı qalyptasty: eki myq­­ty boksshymyz – Jáni­bek Álimhanuly men Ádil­bek Nııazymbetov kóshbas­shylyqqa talasady. Sizdiń oıy­ńyzsha, dál osyndaı báse­kelestik bizge paıdaly ma? – Básekelestik – ósýge yn­talandyratyn dúnıe. Bul jerde myqtylardy ókshe­lep kele jatqan jastardy da umyt­paýymyz kerek. Qa­laı bolǵan kúnde de, jattyqtyrýshylar shyn myqtyny tańdap alady degen oıdamyn. Álbette, ýaqyt bárine tóreshi. – Álimhanuly men Nııazym­betov arasyndaǵy jekpe-jek­tiń qaı týrnırde jáne qa­laı ór­bıtinin elestetip kórý­ge bola ma? – Qıyn... Ekeýi de ońqaı, halyqaralyq jarystardan jınaǵan mol tájirıbeleri bar jáne de ekeýiniń de tehnıkalyq deńgeıi óte joǵary. Delebeni qozdyratyn jekpe-jek bolady dep oılaımyn. – Abylaıhan Júsipovtiń 69 kılo salmaqqa aýysqany týraly ne aıtasyz? – Bul durys jáne de der kezinde qabyldanǵan sheshim. Onyń jasy ósip, salmaǵy da artyp keledi. Tehnıkalyq qabileti jaǵynan da Júsipovtiń quramadaǵy birinshi nómir bolyp bekýine mol múmkindigi bar. Byltyrǵy Qazaqstan chempıonatynda ol barlyq jekpe-jekterin senimdi ótkizip, kópshi­likti qýantty. Kóz aldymyzda ósip keledi. – Aýyr salmaqtaǵy Ivan Dychkony laıyqty túrde kim almastyra alady dep oılaısyz? – Bul salmaqta namysty qoldan bermeıdi degen birqatar boksshylar bar. Atap aıtqanda, Qamshybek Qońqabaev, Oljas Boqaev, Nurlan Saparbaı jáne taǵy basqalar. Ras, tájirıbe men turaqtylyq jaǵynan kelgende Ivan Dychkoǵa jeteri joq. Degenmen, jastardy tájirıbe jınaýy úshin synǵa aıamaı sala berý kerek. – Ilııas Súleımenovtiń 56 kılo salmaqqa aýysqany ózine paıdaly ma? – Meniń oıymsha, bul salmaq onyki emes. Qalaı bolǵanda da, ol 52 kılo salmaq dárejesinde senimdi óner kórsetti. Aýyrlaý salmaqqa ne úshin aýysqany men úshin túsiniksizdeý. Bul endi, onyń ózine jáne jattyq­tyrýshysyna ǵana málim dúnıe. Al ázirge, bul salmaqtaǵy kósh­bas­shy – Qaırat Erálıev. – Qurama komandada ja­ńa kapıtan – Ádilbek Nııazym­betov... – Bári durys. Ádilbek Nııazym­betov bul qurmetke laıyq­ty ekenin óziniń jeńis­terimen dáleldedi. Eki Olım­pıada synynda kúmis júlde alý degenińiz – aıtýǵa ǵana ońaı. Táji­rıbesi mol, quramadaǵy jol­das­tarynyń oǵan degen se­ni­mi de zor. Ol komandany alǵa bas­­tap, órge súıreıdi dep sene­min. – Bıyl Ulttyq Olımpıada komıteti óziniń 25 jyldyq mereıtoıyn atap ótedi. Elimizdiń basty sporttyq uıymy osy ýaqyt aralyǵynda ne tyndyra aldy dep oılaısyz? – Shırek ǵasyr ýaqyt ishinde Qazaqstan sporty aıaǵyna nyq turyp, halyqaralyq arenada tolaıym tabystarǵa qol jetkizdi. Ulttyq Olımpıada komıteti sportshylardy jańa bıikterdi baǵyndyrýǵa yntalandyryp, árqashan da jan-jaqty kómek kórsetip keledi. – Áńgimeńizge rahmet. Áńgimelesken Qaırat ÁBILDINOV, «Egemen Qazaqstan»