Astanadaǵy Ulttyq kitaphanada "Egemen Qazaqstan" jobalaryn tanystyrý rásimi bastaldy. Sharany ashyp, júrgizgen "Egemen Qazaqstan" gazeti Basqarma tóraǵasy Darhan Qydyráli basylym qolǵa alǵan úsh jobanyń mán-maqsatyn túsindirdi.
"Sıfrly Qazaqstan" baǵdarlamasy aıasynda iske asatyn sharalardyń alǵashqysy – «Egemen Qazaqstan» gazetiniń arhıvtegi barlyq nómirlerin jınaqtap, betterin túgeldeı skanerleý arqyly sıfrly nusqaǵa kóshirý. Bul jumystar bas basylymnyń 100 jyldyq mereıtoıyna oraı qolǵa alynǵan bolatyn. Joba aıasynda gazettiń «Ushqyn» degen ataýmen alǵash 1919 jylǵy 17 jeltoqsanda shyqqan kezinen bastap, «Eńbek týy», «Eńbekshil qazaq», «Eńbekshi qazaq», «Sosıaldy Qazaqstan», «Sosıalıstik Qazaqstannan» «Egemen Qazaqstanǵa» deıingi nómirleri sıfrly muraǵatqa jınaqtalady.
"Elbasy halyqqa joldaýynda Sıfrly Qazaqstan" jobalaryn bastaýdy tapsyrǵan bolatyn. Osy baǵdarlama aıasynda "Egemen Qazaqstannyń" júz jyldyq tarıhynda shyqqan sandaryn sıfrly júıelerge engizýdi qolǵa aldyq. Birinshiden, bul gazettiń muraǵatyn saqtaýǵa, ony qorǵaýǵa múmkindik beredi. Ekinshiden, zertteýshiler úshin óte tıimdi bolady", dedi Darhan Qydyráli. Gazet nómirlerin tolyqtaı sıfrly formatqa kóshirý kelesi jyly aıaqtalady.
Jurtshylyq nazaryna usynylǵan jobalar jóninde pikir bildirgen jazýshy, qoǵam qaıratkeri Sultan Orazalın "Egemenniń" tarıhy - eldiń tarıhy" deı kele, sıfrly formattaǵy gazet sandary el tarıhyn zertteýshilerdiń jumysyn jeńildetetinin aıtty.
Ekinshi joba «Sıfrly Qazaqstan: Máńgilik El muralary» dep atalady.
Onyń aıasynda «Egemenniń» asa baı fotomuraǵatynda saqtalǵan, Qazaqstannyń keńes dáýirindegi tarıhyn, táýelsizdiktiń mańyzdy sátteri men jarqyn jetistikterin, qarapaıym adamdar turmysyn beıneleıtin sýretter, sondaı-aq Elbasynyń, ózge de kórnekti memleket, qoǵam jáne mádenıet qaıratkerleri men ataqty sportshylardyń, Qazaqstan qalalary men kórikti jerleriniń sırek fotosýretteri Ýıkıpedııa onlaın-ensıklopedııasy arqyly ǵalamtor paıdalanýshylaryna usynyla bastady.
«Álemniń kez kelgen túkpirinen ınternet arqyly Qazaqstandy izdegen adam osy sýretterdi kóredi. Sýretterdiń aǵylshyn, orys, qazaq tilindegi túsindirmeleri bolady. Birinshiden, bul joba arqyly asa qundy fotomaterıaldardy joǵalýdan saqtaımyz. Ekinshiden, olardy kópshilik nazaryna usynamyz», dedi basylym jetekshisi Darhan Qydyráli.
