О́kpe ragy órship tur

Jyl saıyn elimizde 33 myń adam qaterli isikke shaldyǵady. Onyń bes paıyzy ǵana týa bitti aqaýdan paıda bolady eken. Atyraýda tynys alý organdarynyń aýrýy, sonyń ishinde ókpe ragy kóp tirkeledi. Oblystyq onkologııa dıspanseriniń bas dárigeri Jeksenbaı Nysanov bul aýrýǵa shaldyǵýǵa shylym shegý, salamatty ómir saltyn saqtamaý jáne ekologııalyq ahýaldyń nasharlaýy sebep bolyp otyrǵanyn aıtady. Qaterli isikti anyqtaýda búgingi medısınanyń múmkindigi mol, biraq aýyr derttiń alǵashqy belgileri baı­qalmaı ótedi. Sondyqtan da naýqastardyń 70 paı­yzynda isik úshinshi, tipti, tórtinshi satysynda da­mıtyny anyqtalǵan. Turǵyndardyń skrınıngtik tek­serýlerge áli de nemquraıly qaraıtyny taǵy bar. Sońǵy skrınıngtik tekseris nátıjeleri asqazan, óńesh joldarynyń qaterli isigi beleń alyp bara jatqanyn anyqtapty. Sondyqtan da oblystyq densaýlyq saqtaý basqarmasy aty jaman aýrýdyń aldyn alý, emdeý sapasyn jaqsartý maqsatynda «Onkologııalyq ınnovasııalar» taqyrybynda res­pýb­lıkalyq ǵylymı-tájirıbelik konferensııa ót­ki­zip, elimizdiń ár aımaǵynan elýge jýyq dárigerdi Aty­raý­ǵa jınady. Olarǵa Astana men Almatydan kelgen bi­likti mamandar dáris oqydy. Sondaı-aq, naýqastarǵa reseılik akademık ota jasady. Qazir oblystyq onkologııalyq dıspanserde 3464 emdelýshi tirkeýde tur. О́kinishtisi, jyl saıyn 500-deı adam osy aýrý saldarynan kóz jumady. Oblystyq den­saýlyq saqtaý basqarmasynyń keńesshi onkologi, me­dısına ǵylymdarynyń doktory Qaıyrjan Ábı­satovtyń aıtýynsha, aımaqta jylyna 850 adam­nan qa­terli isik tabylady eken. Bir «qyzyǵy» – aty­raý­­lyqtar syrqattana qalsa, emdi syrttan izdeıdi. She­­k­ara asyp, shet elge ketetinder kóp. Jergilikti dá­ri­ger­lerge degen senimsizdikke boı aldyryp, aýrýla­ryn as­qyndyryp alatyndar da kezdesedi. Árıne, naý­qas qaı­da emdelse de erki, degenmen, bul durys emes, deı­di dárigerler. О́ıtkeni, qazir Atyraýdaǵy on­ko­lo­gııalyq dıspanserdiń jaǵdaıy jaqsarǵan, zamanaýı tehnologııanyń túr-túri bar, mamandar da tájirıbeli. Baqytgúl BABASh, «Egemen Qazaqstan» ATYRAÝ