«Qazaqstannan hat-habar» aıdarymen jarııalanǵan maqalada Ortalyq Azııa turǵyndary asyǵa kútetin Naýryz merekesiniń mán-maǵynasy jáne Qazaqstan Respýblıkasynda ony qalaı toılaıtyny jazylǵan.
Maqalada Shyǵys halyqtary úshin asa mańyzdy mereke Naýryz kelgende ejelgi ǵun zamanyndaǵy kóshpendiler erte turyp, Kúndi qarsy alǵandyǵy týraly aıtylady. «Kóktemdi qarsy alǵanda Ortalyq Azııa halyqtary aǵash egip, bulaq kózin ashady» deı kele, Naýryzdyń qazaq tanymymen baılanysyn baıandaıdy. Avtor qazirgi zamandaǵy naýryz aıshyqtaryn da sýrettegen. Mereke kúni Astana, Almaty shaharlarynda Elbasy men qala basshylarynyń quttyqtaý sózimen ashylatyn Naýryz meıramynyń toılanýy týraly jazylǵan.
Maqalanyń «Taý baýraıyndaǵy Jambyl aýylynda» degen bóliminde 2009 jyly bir top japon azamattarynyń Jetisý jerindegi Jambyl aýylynda qonaqta bolyp, anasynyń qolynan naýryz kójeden dám tatqanyn esine alǵan jýrnalıst naýryz kóje dáminiń ereksheligi men pisirý ádisterine toqtalady. Jýrnalıst Japonııada 21 naýryzda jeti túrli ósimdikten kóje ázirlense, Qazaq eli Uly meıramǵa arnalǵan naýryz kójeni birlik pen berekeniń sımvoly sanaıtynyn, Naýryz kúni eshkimdi alalamaı, dastarqannan ár adam dám tatý kerektigin aıtqan.
«Egemen-aqparat»
