Qoıylymnyń basty keıipkerleri Aqan Seri men Aqtoqty rólderin teatrdyń jas akterleri Ernat Muhamethanov pen Almıra Aıtjanova somdady. Teatrdyń Qanatbek Nııazbekov, Saırash Qopabaeva, Tursynbek Dúzbaev syndy saqa akterleri Haziret, Dámeli (Aqtoqtynyń sheshesi), Qońqaı (Aqtoqtynyń ákesi) beınelerin sátimen alyp shyǵa bildi. Jalmuqan (Syrym Maratbek), Márzııa (Mádına Isına), Mylqaý (Qamıt Qalyq), Seıit (Jasulan Serketaev), Murat (Mıras Razhanov), Serdáli aqyn (Qaırat Muqyshev), Balta (Darhan Sadybaev), Qarasaqal (Arystanbek Muqııat), Jylkeldi (Ertaı Hasenov) rólderindegi ónerpazdardyń ónerin de kópshilik jyly qabyldady.
− Teatrymyzda 2000 jyly «Qozy Kórpesh-Baıan sulý» qoıylǵan edi. Sodan bergi ýaqytta eshqandaı klassıka qoıylmady. «Aqan seri-Aqtoqty» syndy kúrdeli qoıylymdy ne úshin qoıyp otyrmyz? Birinshiden, bul kórermender úshin qajet. Ekinshiden, akterlerdiń sheberligin arttyrý úshin kerek. Ǵabeń sekildi klassık jazýshylardyń kórkem sózderi teatr akterleriniń tanym kókjıegin keńeıte túseri anyq. Bul týyndy qazir respýblıkada sırek sahnalanady. Qazir Almatydaǵy M.Áýezov teatry men bizdiń teatrda qoıylyp jatyr. Premerany halyq óte jaqsy qabyldady. Ata-ájelerimiz de, orta býyn ókilderi de, jastar da osyndaı klassıkalyq dúnıelerdiń kerek ekendigin aıtyp, jyly lebizderin bildirdi. Josparymyz kóp. Qazir ártúrli janrdaǵy qoıylymdardy daıyndap jatyrmyz. Aldaǵy ýaqytta kóre jatarsyzdar, – deıdi teatrdyń kórkemdik jetekshisi Sahan Ákeleev.
Azamat QASYM, «Egemen Qazaqstan»
О́SKEMEN
