Eli úshin qý janynan bezinip, bastaryn báıgege tikken qaıratker uldardy eske alýǵa arnalǵan asta oblys ákiminiń orynbasary Rýslan Rústemov, akademık Dosmuhambet Kishibekov, qoǵam qaıratkeri Ábdijálel Bákir, «Mustafa Shoqaı» qorynyń tóraǵasy Bazarbaı Atabaevtar sóz sóıledi. Sonymen qatar, Syrdyń bas qalasynda Alashtyń jáne Túrki áleminiń ardaqtysy Mustafa Shoqaıǵa arnalǵan eskertkishtiń saltanatty ashylý rásimi ótti.
Eskertkishtiń ashylý saltanatynda Qyzylorda oblysynyń ákimi Qyrymbek Kósherbaev aımaq turǵyndaryn osynaý eleýli oqıǵamen quttyqtady.
- Mustafa Shoqaı – kez-kelgen iri tarıhı qubylys sekildi birjaqty sıpattaýǵa bolmaıtyn, úırenshikti qalypqa salýǵa kelmeıtin tulǵa. Ol sol zamandaǵy asa kúrdeli ǵalamdyq tarıhı prosesstiń bel ortasynda, epısentrinde júrip, Túrki áleminiń, óz ultynyń múddesin qorǵaýǵa tyrysty. Sondyqtan Mustafa Shoqaı aq pen qyzylǵa nemese qońyrǵa jaq, ıa qarsy boldy degen qarabaıyr túsinikke syımaıdy. Ol óziniń búkil ǵumyryn, kúlli qajyr-qaıraty men aqyl-oıyn týǵan halqynyń, túbi bir tutas túrki jurtynyń birigip órkendeýine arnady,- dedi Qyrymbek Eleýuly.
Sondaı-aq, saltanatty sharada QR UǴA akademıgi, Q.Sátbaev atyndaǵy Qazaq ulttyq tehnıkalyq ǵylymı zertteý ınstıtýtynyń professory Dosmuhambet Kishibekov, QR Parlamenti Senatynyń depýtaty Murat Baqtııaruly quttyqtaý sóz sóıledi.
Eskertkishti Qazaqstan Sýretshiler odaǵynyń múshesi, músinshi Kósher Baıǵazıev salǵan. Eskertkishtiń jalpy bıiktigi 12 metrdi quraıdy.
Erjan BAITILES, "Egemen Qazaqstan"
QYZYLORDA
